बिशेष अनलाइन । कोरोना भाइरसको त्रास कम भएसँगै चलचित्र गतिविधि बिस्तारै बढ्न थालेका छन् । चलचित्र हलहरु खुलिसकेका छन् । राम्रा चलचित्र प्रदशैनमा आए नेपाली दर्शक पनि बिस्तारै हलमा गएर चलचित्र हेर्न थालेका छन् । ठुला ब्यानरमा निर्माण भएका चलचित्रहरुले पनि धमाधम प्रदर्शन मिति तोक्न थालेका छन् । छायांकन बिचैमा रोकेर बसेका चलचित्रहरुको पनि बिस्तारै छायांकन सुरु गरिएको छ ।
यसै बिच कोरोना भाइरसका कारण बिचमै छायांकन रोकिएर पछि पुन छायांकन गरिएको चलचित्र ‘परदेशी–२’ले आफ्नो प्रदर्शन समय तय गरेको छ । चलचित्र छायांकनको सुरुवात देखि नै दशैमा प्रदर्शन गर्ने ढिट लिएको चलचित्र अब भने आउदो दशैमा हेर्न पाइने भएको छ । सुरुमा यो चलचित्रलाई २०७७ सालको दशैंमा प्रदर्शन गर्ने बताइएको थियो । तर, कोरोना भाइरसका कारण चलचित्र छायांकन नै हुन सकेन । पछि २०७८ सालको दशैमा प्रदर्शन गर्ने बताइएको थियो । उक्त समय पनि कोरोना महामारीको लहर चलिरहेका कारण चलचित्र प्रदर्शन हुन सकेन । चलचित्र निर्माण युनिटले आउदो २०८९ को दशैमा भने चलचित्र प्रदर्शन गर्ने योजना बनाएको छ ।
चलचित्रका निर्माता तथा निर्देशक नारायण रायमाझीका अनुसार चलचित्र ‘परदेशी–२’ले दशैको कथा बोल्ने भएका कारण पनि अन्य समयमा प्रदर्शन गर्न नसकिएको हो । निर्देशक रायमाझी भन्छन्– ‘हामीले चलचित्रको कथा लेखन गर्दाको समयबाट नै दशैमा प्रदर्शन गर्ने योजना बनाएका थियौँ । कोरोनाका कारण पुर्वघोषित समयमा हामीले चलचित्र प्रदर्शन गर्न सकेनौ । दशैको कथा भएका कारण पनि अन्य समयमा चलचित्र प्रदर्शन गर्नुको औचित्य रहदैन, त्यसैले पनि आउने दशैमा चलचित्र प्रदर्शन गर्ने योजना बनाएका हौँ ।’
चलचित्र ‘परदेशी’ले राम्रो व्यापार गरेका कारण पनि चलचित्र ‘परदेशी–२’लाई अपेक्षित चलचित्रका रुपमा हेरिएको छ । लोक दोहोरीमा राम्रो छाप छाड्न सफल गायक प्रकाश सपूतले यसै चलचित्रबाट नेपाली चलचित्रमा डेव्यु गर्दैछन् । गायक सपूतको अभिनयका कारण पनि चलचित्रलाई बिशेषरुपले हेरिएको छ । प्रकाशसँगै चलचित्रमा दिलीप रायमाझी, प्रशान्त तामाङ, केकी अधिकारी, वर्षा सिवाकोटी, नीर शाह, सुशील पोखरेल, रमा थपलिया, देवेन्द्र बब्लू लगायतका कलाकारको अभिनय देख्न सकिन्छ ।
चलचित्रको कथा रमेश बिजीले लेखेका हुन् । चलचित्रमा मानकृष्ण महर्जनको छायाँकन, अष्ट महर्जनको द्धन्द निर्देशन, बीबी अनुरागीको संगीत तथा गोविन्द राई र रामजी लामिछानेको कोरियोग्राफी रहेको छ । चलचित्रको सम्पाद भने दीर्घ खड्काले गरेका हुन् ।
चलचित्र नारायण इन्टरनेशनल प्रालिको ब्यानरमा निर्माण भएको हो । चलचित्र निर्माणमा रायमाझीलाई राजेश वंशलले साथ दिएका छन् । चलचित्र दशैमा प्रदर्शन गर्ने भनिएको भए पनि हाल सम्म मिति भने तय भइसकेको छैन । केही दिन भित्रमा मिति पनि सार्वजनिक गर्ने तयारीमा निर्माण युनिट रहेको छ ।
Discussion about this post