विशेष अनलाइन । यम थापाको निर्देशनमा निर्माण भएको बहुप्रतिक्षित चलचित्र ‘लालीबजार’ को पहिलो गीत ‘मायालाई के दिऊँ म बैना’ एक विशेष कार्यक्रमका बीच सार्वजनिक गरिएको छ। लोकलयमा आधारित यस गीतमा गायक खेम सेन्चुरी र दीपिका बयम्बु मगरको सुमधुर स्वर रहेको छ भने संगीत स्वयं सेन्चुरीले भरेका हुन्। रमेश बिजीका शब्द रहेको यस गीतमा मायाको निशानी सुम्पिएको भावनात्मक विषयलाई प्रमुखताका साथ प्रस्तुत गरिएको छ।
राजधानीको क्युएफएक्स सिभिल मलमा आयोजित गीत सार्वजनिक कार्यक्रममा अभिनेत्री स्वस्तिमा खड्काले सार्वजनिक गीतमा छमछमी नाचेर माहोल तताएकी थिइन्। उनलाई नृत्यमा बाल कलाकार समाइरा थापाले साथ दिएकी थिइन् भने हलमा उपस्थित दर्शकले ताली र सिटी बजाएर उनीहरूको उत्साह बढाएका थिए। प्रदीप लामाको कोरियोग्राफी रहेको यस गीतको भिडियोमा स्वस्तिमा र समाइराका साथै प्रदीप लामा, रवीन्द्रसिंह बानियाँ, मुकुन्द श्रेष्ठ र नव-कलाकार विशाल देवकोटाको समेत आकर्षक नृत्य देख्न सकिन्छ।
षट्कोण आर्ट्सको ब्यानरमा निर्माण भएको यस चलचित्रमा स्वस्तिमा खड्का, रवीन्द्रसिंह बानियाँ, मुकुन्द श्रेष्ठ, अभय बराल, आशा पौडेल लगायतका कलाकारहरूको सशक्त अभिनय रहेको छ। यसै चलचित्रमार्फत विशाल देवकोटा र प्रशंसा सुवेदीले नेपाली रजतपटमा डेब्यु गर्दैछन्। निर्देशक यम थापाको कथा रहेको यस चलचित्रको पटकथा र संवाद लेखनमा निर्देशक थापालाई चर्चित निर्देशक प्रदीप भट्टराईले साथ दिएका छन्।
सुशन प्रजापतीको छायांकन, मित्रदेव गुरुङको सम्पादन र सम्राट बस्नेतको द्वन्द्व निर्देशन रहेको यस चलचित्रका कार्यकारी निर्माता प्रदीप भट्टराई हुन् भने म्याक्स दीपेश खत्री र रवीन्द्रसिंह बानियाँले निर्माणको जिम्मेवारी सम्हालेका छन्। चलचित्रमा प्रकाश सपूत, खेम सेन्चुरी र जयन जे वाइवाको संगीत सुन्न सकिनेछ।
कार्यक्रममा बोल्दै अभिनेत्री खड्काले आफूले यसअघिका चलचित्रभन्दा फरक भूमिका निर्वाह गरेकाले ‘लालीबजार’ दर्शकको विशेष रोजाइमा पर्ने विश्वास व्यक्त गरिन्। आगामी नयाँ वर्षको अवसर पारेर बैशाख १८ गतेबाट देशभरका सिनेमा घरमा प्रदर्शन हुने तयारीमा रहेको यो चलचित्रले नेपाली मौलिक कथालाई पर्दामा उतारेको छ।
Discussion about this post