‘बमबहादुर’ को प्रदर्शन मिति तय,कात्तिक ३० गतेदेखि प्रदर्शन हुने

विशेष अनलाइन । जोन राईले निर्देशन गरेको चलचित्र ‘बमबहादुर’ को प्रदर्शन मिति तय भएको छ । निर्माण टिमले अभिनेता सौगात मल्लको मुख्य भूमिका रहेको चलचित्रको पोस्टर सार्वजानिक गर्दै प्रदर्शन मिति तय गरेको हो । चलचित्र कात्तिक ३० गतेदेखि प्रदर्शनमा आउने भएको छ ।

निर्देशक राईले रहस्य, कौतुहलता, प्रेम र सामाजिक कुरालाई चलचित्रको कथामा मिश्रण गरिएको बताएका छन् । बमबहादुर नामक पात्रको जीवनमा चार दशक पहिले भएका घटनाले उसको वर्तमानलाई कसरी प्रभावित गरेको छ भन्ने कथावस्तु चलचित्रमा समेटिएको जनाइएको छ ।

निर्देशक राई भन्छन् , ‘ चलचित्रको कथाले दर्शकलाई बमबहादुरको बाल्यकालमा पुर्‍याउँछ, जहाँ उनका सुन्दर पल एकाएक विगतको घटनाले छिन्नभिन्न हुन्छन् । वर्तमान र विगतको कथा जोड्दै फिल्म नाटकीय उत्कर्षमा टुंगिन्छ जसले सस्पेन्स, रोमान्स र सोसल ड्रामाका सबै धागालाई बुन्छ ।’

विष्ट ब्रदर्स फिल्म्सको ब्यानरमा बनेको चलचित्रमा मल्लसहित प्रशान्त राई, अनिशा रसाइली, भास्कर प्रधान, महेन्द्र बागदास, मदन भुजेल, भरत वशिष्ठ, रिया भुजेल, शान्तिला तामाङ, वाशित कार्की र सुरेश पाँचकोटीलगायत कालकारहरुको अभिनय रहेको छ । चलचित्रको निर्माता सञ्जीव सार्की रहेका छन् । जोन राई र रुपेश तामाङको पटकथा रहेको चलचित्रमा सुजोय घोषले छायांकन गरेका छन् । चलचित्रमा संगीत दीपकंरसिंह मुखियाले दिएका छन् ।