विशेष अनलाइन । सञ्जोग राई को निर्देशनमा बनेको चलचित्र ‘देवी’ले टिजर सार्वजनिक गरेको छ । चलचित्रको टिजरले समाजमा घट्ने बलात्कार जस्ता अपराजन्य घटनामा कानुनले पार्ने प्रभाव र त्यसले निम्त्याउने परिणामको कथा पेश गरेको छ ।
चलचित्रको सार्वजनिक टिजरमा समावेश एक संवादले सिनेमा केही वर्ष अघि सुदुरपश्चिममा घटेको नाबालिक १३ बर्षिय निर्मला पन्तको बलात्कारपछि हत्यामा आधारित रहेको बुझ्न सकिन्छ । चलचित्रका मुख्य कलाकारलाई स्थान दिइएको सार्वजनिक यो टिजरले दर्शकमाझ कौतुहल्ता पैदा गर्ने देखिन्छ ।
क्राइम थ्रिलर जनरामा निर्माण भएको चलचित्रको कथा निर्देशक राईले अजय गौतमसँग मिलेर लेखेका छन् । चलचित्र ‘देवी’ एक्जिबिट स्टुडियोको प्रस्तुतिमा बनेको छ । सार्वजनिक प्रदर्शनको लागि यो चलचित्र निर्माण टिमले बाँसुरी फिल्म्ससँगको सहकार्य गरेको छ ।
चलचित्र नेपाल सहित विदेशमा एकसाथ प्रदर्शनमा आउने भएको छ । चलचित्रमा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपाने, ध्रुब कोइराला, निरिक्षा घतानी, विशाल पहारी, निरु खड्का, जीवन जंग खड्का र विकास पन्तको अभिनय रहेको छ । सन्जेन थापाको चलचित्रमा एक्सन रहेको छ ।
रेमन गुरुङ, नारायण राई र सञ्जोग राईको निर्माण रहेको चलचित्रमा कार्यकारी निर्माता जावेद खान तथा सह-निर्माता उजेन नोर्वे गुरुङ र मिलन लामा हुन् । जोएल फ्रोमले छायांकन गरेको चलचित्रको पटकथामा निर्देशक राईलाई अजय गौतमले सघाएका छन् । चलचित्रलाई मनोज राठी र उज्वल पौडेलले वितरण गर्दैछन् ।
चलचित्र भदौ २१ गते तीजको अवसर पारेर प्रदर्शनको तयारीमा रहेको छ ।
Discussion about this post