विशेष अनलाइन । चलचित्र ‘पूर्ण बहादुरको सारङ्गी’ मार्फत सफलताको शिखर चुमेका अभिनेता विजय बराल अब फरक पहिचानका साथ दर्शकमाझ आएका छन्। पर्दामा आफ्नो स्वाभाविक अभिनयले सबैलाई भावुक बनाउने विजयले यसपटक भने स्वरमार्फत समाज र राजनीतिका विकृति विरुद्ध आवाज उठाएका छन्। उनको पहिलो गीत ‘विधिको शासन’ सार्वजनिक भएसँगै उनको साङ्गीतिक डेब्यु केवल एउटा रहर मात्र नभई सत्ता र व्यवस्थाप्रतिको एउटा दह्रो खबरदारीका रूपमा हेरिएको छ।
गीतको मर्म र सन्देश सौरभ कार्कीको शब्द र प्रशान्त सिवाकोटीको सङ्गीत रहेको यस गीतले नेपालको वर्तमान राजनीतिक अवस्थालाई सुक्ष्म ढंगले चित्रण गरेको छ। विशेष गरी भदौ २३ र २४ गते काठमाडौँको सडकमा उर्लिएको ‘जेनजी’ (Gen Z) पुस्ताको विद्रोह र उनीहरूले उठाएका जायज मुद्दाहरूलाई यो गीतले मुख्य विषय बनाएको छ। देशको विकास कुनै व्यक्तिको सनकले नभई स्थापित पद्धति र विधिको पालनाबाट मात्र सम्भव छ भन्ने मूल मर्म यस सिर्जनाले बोकेको छ।
विजय बरालको नयाँ अनुभव आफ्नो पहिलो गायन अनुभवबारे विजय निकै सन्तुलित सुनिन्छन्। आफू व्यावसायिक गायक नभए पनि विषयवस्तुको गम्भीरता र साथीभाइको प्रेरणाले गर्दा स्वर दिएको उनी बताउँछन्। उनी भन्छन्: “यो गीत कुनै व्यक्ति विशेषको विरोधमा होइन, बरु सत्ता र शासन प्रणालीमा देखिएका बेथितिहरू विरुद्धको एउटा रचनात्मक व्यङ्ग्य हो।”
दृश्यमा इतिहासको दस्ताबेज मनिष राउतको अवधारणामा तयार पारिएको यस गीतको भिडियो एउटा प्रभावशाली ऐतिहासिक दस्ताबेज जस्तो बनेको छ। भिडियोमा २०४० सालको आन्दोलनदेखि २०६२/६३ को जनआन्दोलन र हालैका युवा विद्रोहका वास्तविक दृश्यहरू समावेश गरिएका छन्। सडकमा देखिएको आक्रोश र राज्यको दमनलाई दुरुस्तै उतारेको यो भिडियोले साङ्गीतिक प्रस्तुतिका साथै एउटा छोटो वृत्तचित्रको झल्को दिन्छ। यसले आन्दोलनका घाइते र सहिदहरूप्रति सम्मान प्रकट गर्दै अधुरा मागहरू पूरा हुनुपर्ने दबाब समेत सिर्जना गरेको छ।
Discussion about this post