विशेष अनलाइन । अशोक शर्मा निर्देशित नयाँ चलचित्र ‘डबल ट्रिपल’ को छायांकन यतिबेला पूर्वी नेपालको झापामा धमाधम भइरहेको छ। विगत एक सातादेखि जारी यस चलचित्रको छायांकन अन्तिम चरणमा पुगेको छ। निर्देशक शर्माका अनुसार अबको केही दिनमा नै झापाको छायांकन सेड्युल पूरा हुनेछ।
हालै छायांकन स्थलबाट केही ताजा तस्वीरहरू सार्वजनिक भएका छन्, जसले चलचित्रका मुख्य कलाकारहरूको ‘लुक्स’ र भूमिकाबारे कौतुहलता जगाएको छ। सार्वजनिक फोटोअनुसार अभिनेत्री मिरुना मगर नेपाल प्रहरीको भूमिकामा देखिएकी छिन्। प्रहरीको पोसाकमा देखिएकी मिरुनाको यो नयाँ अवतारले दर्शकमाझ चर्चा बटुलेको छ।
त्यस्तै, अभिनेता खगेन्द्र लामिछाने भने यस चलचित्रमा ‘डन’ को भूमिकामा प्रस्तुत हुँदैछन्। उनको गेटअप र चरित्र विगतका चलचित्रभन्दा भिन्न देखिएको छ। छायांकन सेटमा खगेन्द्रका साथै अभिनेता दयाहाङ राई र वरिष्ठ कलाकार राजाराम पौड्याललाई पनि देख्न सकिन्छ, जसले चलचित्रको कलाकार टोली निकै सशक्त रहेको पुष्टि गर्छ।
यो चलचित्रलाई आगामी दशैं वा तिहारको अवसर पारेर प्रदर्शनमा ल्याउने तयारी भइरहेको चर्चा छ। यद्यपि, निर्माण पक्षले प्रदर्शन मितिको बारेमा हालसम्म कुनै स्वतन्त्र वा आधिकारिक पुष्टि भने गरिसकेको छैन। निर्देशक शर्माले केही दिनमा छायांकन सकेर पोस्ट-प्रोडक्सनको काम अगाडि बढाउने जानकारी दिएका छन्।
Discussion about this post