विशेष अनलाइन । नेपाली सुगम संगीत र पार्श्व गायनका प्रतिष्ठित गायक रामकृष्ण ढकाल अब चलचित्र निर्माणको क्षेत्रमा पनि सक्रिय भएका छन्। उनले निर्माण गरेको चलचित्र ‘मालती मंगले’ को आधिकारिक टिजर हालै सार्वजनिक गरिएको छ। करिब अढाइ दशकअघि आफ्नै सांगीतिक जीवनमा आधारित चलचित्र ‘आशीर्वाद’ मार्फत अभिनयमा देखिएका ढकालले यसपटक पर्दा पछाडि बसेर ग्रामीण परिवेशको कथालाई प्रस्तुत गरेका हुन्।
प्रकु पाण्डेको निर्देशन रहेको यस चलचित्रले ग्रामीण दम्पतीको प्रेम, उनीहरूको सम्बन्धमा आउने उतारचढाव र तत्कालीन सामाजिक परिवेशलाई मुख्य विषयवस्तु बनाएको छ। सार्वजनिक टिजरको सुरुवात चलचित्रका शीर्ष कलाकार विजय बराल र वर्षा राउत बिचको प्रेमाकर्षणबाट हुन्छ। टिजरमा उनीहरूको प्रेमिल सम्बन्धसँगै पछि देखिने द्वन्द्व र चुनौतीहरूलाई सङ्केत गर्दै दर्शकमाझ कौतुहलता जगाउने प्रयास गरिएको छ।
रानी फिल्म्सको प्रस्तुति रहेको यस चलचित्रमा विजय र वर्षाका साथमा मेक्सम गौडेल, प्रकाश घिमिरे, सुवर्ण थापा, उमेश सुनाम, सुस्मा निरौला र सरिता गिरीको सशक्त अभिनय रहेको छ। साथै, बाल कलाकारहरू नरिन थापा र मन्सु सापकोटाले पनि चलचित्रमा अभिनय गरेका छन्। संयोग गुरागाईंको पटकथा तथा संवाद रहेको यस चलचित्रलाई महेश पौडेलले छायांकन गरेका हुन् भने सम्पादनको जिम्मेवारी रोमी मोसेजले निभाएका छन्।
चलचित्रका सार्वजनिक दुई गीतहरू ‘सुनैको सपनी’ र ‘ढुंगामाथि लेउ’ ले यसअघि नै दर्शक र श्रोताको निकै माया बटुलिसकेका छन्। यी गीतहरूको सफलताले चलचित्रप्रति थप आशा जगाएको छ। रोशन विश्वकर्माको कोरियोग्राफी र मनोज जोशीको कला निर्देशन रहेको यस चलचित्रका कार्यकारी निर्माता सागर ज्ञवाली हुन्।
ग्रामीण जीवनको यथार्थपरक कथा पस्कने तयारीमा रहेको यो चलचित्र आगामी वैशाख २५ गते देखि नेपालभरका सिनेमा हलहरूमा प्रदर्शन हुने तयारीमा छ।
Discussion about this post