“म पैसा कमाउन मात्र चलचित्र बनाउँदिन, यो मेरो प्यासन हो” – निर्माता सुशील पोखरेल

विशेष अनलाइन । नेपाली चलचित्र जगतमा उतारचढावका बीच पनि निरन्तरता दिने निर्माताहरूको खडेरी छ। एक-दुई चलचित्र असफल हुनासाथ पलायन हुने प्रवृत्तिको विपरीत, निर्माता सुशील पोखरेल भने विगत तीन दशकदेखि यस क्षेत्रमा अटुट रूपमा क्रियाशील छन् । ‘जय शिव शंकर’, ‘जीवनदाता’ र ‘मैदान’ जस्ता सफल चलचित्र पस्केर आफ्नो बलियो पहिचान बनाउनुभएका उनी नाफा-घाटा भन्दा पनि चलचित्र निर्माणलाई आफ्नो मुख्य कर्म र जिम्मेवारी ठान्छन्।

लामो समयको अन्तरालपछि सुशील पोखरेल पुन: निर्माणको मैदानमा उत्रिएका छन्। ‘यात्रा’ पछि करिब सात वर्षको विश्राम लिएका उनले आगामी वैशाख ११ गते प्रदर्शन हुने चलचित्र ‘परालको आगो’ मार्फत आफ्नो दोस्रो पारी सुरु गर्दैछन्। व्यक्तिगत कारणले केही समय ओझेल परे पनि यस नयाँ प्रोजेक्टलाई लिएर उनी निकै आशावादी छन्। हालै सार्वजनिक भएका चलचित्रका गीत र टिजरले दर्शकबाट पाएको सकारात्मक प्रतिक्रियाले उनको मनोबल अझ उच्च बनाएको छ।

निर्माणलाई केवल व्यवसाय मात्र नभई आफ्नो ‘प्यासन’ मान्ने पोखरेल यसपटक दर्शकको विश्वास टुट्न नदिनेमा ढुक्क देखिन्छन्। उनी भन्छन्, “म केवल पैसा आर्जन गर्नका लागि मात्र चलचित्र बनाउँदिन। सुशील पोखरेलले स्तरीय विषयवस्तु नै रोज्छ भन्ने दर्शकको जुन भरोसा छ, त्यसलाई ‘परालको आगो’ ले अझ प्रगाढ बनाउनेछ।” यस चलचित्रले दर्शकलाई पूर्ण मनोरञ्जनका साथै एउटा उत्कृष्ट कथाको अनुभूति गराउने उनको दाबी छ।

लक्ष्मण सुनारको निर्देशनमा तयार भएको चलचित्रमा चर्चित गायक तथा अभिनेता प्रकाश सपूत, सुहाना थापा र सौगात मल्ल जस्ता प्रभावशाली कलाकारहरूको मुख्य भूमिका रहेको छ। साथमा सिर्जना अधिकारी, किशोर भण्डारी र सुनिल थापा लगायतका कलाकारहरूको अभिनयले चलचित्रलाई थप रोचक बनाएको छ। सुशील देवकोटाको लेखन रहेको यस कृतिलाई संकल्प भुजेलले आफ्नो क्यामेरामा कैद गरेका छन्।

वैशाख ११ गतेलाई आफ्नो पुनरागमनको विशेष दिन मानेका निर्माता पोखरेलले यो चलचित्रलाई दर्शकका लागि एउटा उपहारको रूपमा लिएका छन्। मिलन श्रेष्ठको सम्पादन रहेको ‘परालको आगो’ ले नेपाली चलचित्र बजारमा कस्तो छाप छाड्ने हो, त्यो भने प्रदर्शनपछि नै थाहा हुनेछ।