विशेष अनलाइन । सेभेन सिज सिनेमाको नयाँ प्रस्तुति रहेको चलचित्र ‘रोल नं १’ को दुईवटा पोस्टर सार्वजनिक गरिएको छ। आगामी वर्षको जेठ १५ गते अर्थात् गणतन्त्र दिवसको अवसर पारेर देशभरका हलमा प्रदर्शन हुने तयारीमा रहेको यस चलचित्रको पहिलो झलकले दर्शकमा उत्साह थपेको छ। ‘हरेक विद्यार्थीको कथा’ भन्ने ट्यागलाइन दिइएको यस चलचित्रले विशेषगरी नेपाली समाजको यथार्थ, ग्रामीण जीवन र शिक्षाका लागि एउटा परिवारले गर्ने संघर्षलाई मुख्य विषयवस्तु बनाएको छ।
सार्वजनिक गरिएका पोस्टरहरूमा माटोको रङ प्रयोग गरी भुइँमान्छेको कथालाई प्राथमिकता दिइएको छ। एउटा पोस्टरमा अभिनेता मुकुन भुसाल, अभिनेत्री रेणु योगी र बाल-कलाकार निर्भिक रेग्मी ग्रामीण भेषभुषामा देखिएका छन्। अभावका बीच पनि छोरालाई पढाउन लागिपरेको बुबाको काँधमा दमाहा र आमाको थाप्लोमा कालो कराइ देखाइएको छ, जसले उनीहरूको कठिन श्रमलाई चित्रण गर्छ। पृष्ठभूमिमा देखिने पहाडी भेगको सरकारी विद्यालयले ग्रामीण भेगमा शिक्षाको पहुँच अझै चुनौतीपूर्ण रहेको संकेत गर्छ।
अर्को पोस्टरमा बालक आफ्नो बुबाको पिठ्युँमा सुतेको देखिन्छ, जहाँ बुबा र छोराको टाउकोको बीचमा कापी राखिएको छ। यो दृश्यले ग्रामीण अभिभावकलाई शैक्षिक सामग्री जुटाउन समेत कति कठिन छ भन्ने कुरालाई प्रतीकात्मक रूपमा प्रस्तुत गरेको छ। बुबाको थकित अनुहारमा सन्तानको भविष्यप्रतिको चिन्ता र बालकको शान्त मुद्रामा बुबाप्रतिको पूर्ण भरोसा झल्किन्छ। चलचित्रको शीर्षकले कक्षामा प्रथम हुने प्रतिस्पर्धाको कुरा गरे पनि यसले त्यो स्थान पाउन निम्नवर्गीय परिवारले चुकाउनुपर्ने मूल्यलाई गम्भीरताका साथ उठाएको छ।
जोन योञ्जनको निर्देशनमा तयार भएको चलचित्रमा मुकुन भुसाल, सुशांक मैनाली, रेणु योगी र सिर्जना अधिकारीको मुख्य अभिनय रहेको छ। महेश दवाडीले लेखेको यस चलचित्रलाई शिव राम श्रेष्ठले म्याग्दीका रमणीय ग्रामीण भेगहरूमा छायांकन गरेका हुन्। बक्स अफिसमा ऐतिहासिक सफलता पाएको ‘पूर्ण बहादुरको सारङ्गी’ को टिमले नै यो चलचित्र निर्माण गरेकाले पनि दर्शकमाझ यसप्रति ठूलो अपेक्षा र भावनात्मक आकर्षण देखिएको छ।
विनोद पौडेल र जान्वी पौडेल निर्माता रहेको यस चलचित्रलाई नेपालसँगै विदेशमा पनि एकैसाथ प्रदर्शन गरिने तयारी छ। चलचित्रमा प्रशान्त शिवाकोटीको संगीत र मदन घिमिरेको सम्पादन रहेको छ। विद्यार्थी जीवन र शैक्षिक सपनाका वरिपरि घुम्ने यो चलचित्रलाई रिच इन्टरटेन्मेन्ट र जे एम सिनेमाले वितरण गर्ने जिम्मा लिएका छन्।
Discussion about this post