विशेष अनलाइन । बाल गायक अशोक दर्जी अब ठुलो पर्दामा मुख्य भूमिकामा देखिने भएका छन्। अभिनेत्री नीता ढुंगानाको डेब्यु निर्देशनमा तयार हुन लागेको चलचित्र ‘पार्वती’ मा अशोकको सशक्त अभिनय रहने पक्का भएको हो। आइतबार निर्माण कम्पनी नीता फिल्म्सले चलचित्रको थिम पोस्टर सार्वजनिक गर्दै यस विषयमा औपचारिक जानकारी दिएको छ। यसअघि ‘मन बिनाको धन’ मा सहकार्य गरिसकेका नीता र अशोक यो चलचित्रमा पुन: एकसाथ देखिन लागेका हुन्।
विशेष गरी ‘अटिजम’ भएको युवतीको संघर्ष र जीवनलाई पर्दामा उतार्न लागेकी नीताले यस चलचित्रमा स्वयं मुख्य भूमिका निर्वाह गर्दैछिन्। आफ्नो पात्रबारे बोल्दै उनले भनिन्, “यो हास्य, भावना र सामाजिक सन्देश मिसिएको एउटा यस्तो मनछुने कथा हो, जसमा एक साधारण पात्रको नजरबाट जीवनका रङ र सम्बन्धका मिठासलाई देखाइनेछ।” यो चलचित्रले एउटा नितान्त फरक र संवेदनशील सामाजिक कथालाई समेट्ने देखिएको छ।
चलचित्रको निर्माण टोलीले छायाङ्कन र प्रदर्शनको मिति समेत तय गरिसकेको छ। यही चैत २४ गतेबाट क्यामरा अन हुने यस चलचित्रलाई आगामी वर्षको भदौ १२ गते (रक्षाबन्धन) को अवसर पारेर देशभर प्रदर्शन गरिनेछ। रोचक कुरा त के छ भने, सोही मितिमा अर्को चलचित्र ‘बेहुली’ पनि प्रदर्शनमा आउने भएकाले भदौको अन्तिम साता नेपाली चलचित्र बजारमा रोचक प्रतिस्पर्धा हुने निश्चित छ।
प्राविधिक र कलाकारको टिम पनि निकै अनुभवी छानिएको छ। चलचित्रमा दीपाश्री निरौला, सिरु बिष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेल लगायतको अभिनय रहनेछ। लेखनमा नीतालाई शिवम् अधिकारीले संवादमा साथ दिएका छन् भने सुदीप बरालको छायाङ्कन र साहिल खानको सम्पादन रहनेछ। साथै, डान्स ग्रुप ‘कार्टुन क्रु’ का सरोज अधिकारी क्रिएटिभ निर्देशकका रूपमा जोडिएका छन्।
शंकर पाण्डे कार्यकारी निर्माता रहेको यस चलचित्रले दर्शकलाई सामाजिक सचेतनासँगै भावनाको गहिराइमा पुर्याउने विश्वास लिइएको छ।
Discussion about this post