विशेष अनलाइन । नेपाली चलचित्र क्षेत्रमा दुई दशकदेखि अनगिन्ती चर्चित गीतहरू पस्किँदै आएका प्रख्यात संगीतकार अर्जुन पोखरेल अब निर्माणको मैदानमा उत्रिएका छन् । उनले निर्माण गर्न लागेको पहिलो चलचित्र ‘बेहुली’ को बिहीबार शुभसाइत पूजा सम्पन्न गर्दै औपचारिक रूपमा छायांकन सुरु गरिएको छ । यो चलचित्रको सुटिङ तालिका कुल ४५ दिनको तय गरिएको छ, जसलाई लिएर संगीतकार तथा निर्माता पोखरेलले निकै उत्साह व्यक्त गरेका छन् ।
चलचित्रलाई ‘होस्टेल ३’ बाट चर्चामा आएका निर्देशक सशान कँडेल ‘सन्तोष’ ले निर्देशन गर्दैछन् । माधव शर्माको पटकथा रहेको यस चलचित्रले विशेषगरी प्रेमकथा र पारिवारिक विषयवस्तुलाई समेट्ने बताइएको छ । चलचित्रमा पारस बम ‘कुल ब्वाय’, दिब्या रायमाझी, सुशान्त कार्की, पदम तामाङ, सरिता गिरी, सन्तोष बानियाँ र लोकेन्द्र लेखक जस्ता कलाकारहरूको मुख्य अभिनय रहनेछ ।
निर्माणको अनुभवबारे बोल्दै अर्जुन पोखरेलले आफू चलचित्र क्षेत्रकै सदस्य भएकोले अब फरक भूमिकाबाट योगदान दिन चाहेको बताएका छन् । यो चलचित्रको स्क्रिप्टमा विगत दुई वर्षदेखि काम भइरहेको र उत्कृष्ट कथा बुनिएकाले दर्शकहरूलाई हलसम्म आकर्षित गर्नेमा उनी ढुक्क देखिन्छन् । उनले केवल एउटा मात्र नभई, अब प्रत्येक वर्ष एउटा चलचित्र निर्माण गर्ने दीर्घकालीन योजनासमेत सुनाएका छन् ।
‘बेहुली’ को निर्माणमा अर्जुनलाई प्रताप रानाले साथ दिएका छन् भने कार्यकारी निर्मातामा सुमन तामाङ रहेका छन् । त्यसैगरी सहायक निर्मातामा दुर्गा खरेल र रमेश सिलवाल तथा क्रिएटिभ प्रोड्यूसरमा शंकर कोइराला संलग्न छन् । द डिभाइन म्युजिक र सम्मान इन्टरटेनमेन्टको ब्यानरमा निर्माण हुन लागेको यो चलचित्रले उच्च प्राविधिक गुणस्तर कायम गर्ने लक्ष्य राखेको छ ।
काठमाडौंबाट सुरु भएको छायांकन यात्रा जिरी, सिन्धुली, इलाम, काँकडभिट्टा हुँदै भारतको सिक्किमसम्म पुग्ने तालिका छ । चलचित्रको छायांकन नरेन्द्र मैनालीले गर्ने छन् ।
Discussion about this post