विशेष अनलाइन । याक्थुङ चलचित्रकर्मी संघको केन्द्रीय कार्यसमितिको अध्यक्षमा कलाकार तथा निर्माता नवीन मेन्याङ्बो पुनः सर्वसम्मत निर्वाचित भएका छन्। संस्थापक अध्यक्ष समेत रहेका मेन्याङ्बो चैत्र ५ गते धरानमा सम्पन्न संघको दोस्रो महाधिवेशन तथा चौथो साधारण सभाबाट आगामी कार्यकालका लागि चुनिएका हुन्। उनको नेतृत्वमा संघले नयाँ उचाइ लिने विश्वास लिइएको छ।
नयाँ कार्यसमितिमा मेन्याङ्बोको नेतृत्वमा ५ जना उपाध्यक्षहरू चयन गरिएको छ, जसमा तेज मेन्याङ्बो, शैलेन्द्र नाल्वो, दिलीप फुरुम्बो, टेकराज तिगेला र कर्ण सम्वाहाम्फे रहेका छन्। त्यसैगरी, सचिव पदमा प्रकाश लिम्बु, मणिकुमार लिम्बु र रमेश मावोहाङ निर्वाचित भएका छन्। कोषाध्यक्षमा संचमाया सम्बाहाम्फे र सह-कोषाध्यक्षमा सोम बहादुर लिम्बुसहित जम्मा ३५ जनाको जम्बो कार्यसमिति गठन गरिएको छ।
नवनिर्वाचित अध्यक्ष मेन्याङ्बोको चलचित्र यात्रा निकै लामो र संघर्षपूर्ण रहेको छ। वि.सं. २०५२ सालमा ‘थिएटर साहारा’को संस्थापक अध्यक्ष बनेर रंगमञ्चबाट आफ्नो यात्रा सुरु गरेका उनी विगत तीन दशकदेखि निरन्तर कला क्षेत्रमा सक्रिय छन्। उनले रंगमञ्चको अनुभवलाई पर्दामा उतार्दै नेपाली तथा लिम्बु भाषाका चलचित्रहरूमा आफ्नो छुट्टै पहिचान बनाएका छन्।
उनको अभिनय यात्रालाई हेर्ने हो भने ‘लेखान्त’, ‘क्याबिन गर्ल’, ‘क्रस फायर’, ‘आँखिम’, ‘टिनएजर्स’ र प्रदर्शनको तयारीमा रहेको चलचित्र ‘हाङ्नाद’ लगायत एक दर्जनभन्दा बढी चलचित्रहरूमा उनले अभिनय गरिसकेका छन्। यसका साथै उनले टेलिसिरियल ‘कर्म’ र दुई दर्जनभन्दा बढी नाटकहरूमा लेखन, निर्देशन तथा अभिनय मार्फत आफ्नो बहुमुखी प्रतिभा प्रदर्शन गरेका छन्।
मेन्याङ्बो आफ्नो सशक्त अभिनयका लागि विभिन्न पुरस्कारबाट समेत सम्मानित भइसकेका छन्। उनले वि.सं. २०६७ मा चलचित्र ‘टिनएजर्स’ बाट ‘डाबर अवला फावन फिल्म फेस्टिवल’मा उत्कृष्ट अभिनेताको अवार्ड जितेका थिए। त्यस्तै, नाटक ‘निर्दोषी उनी’ बाट सांस्कृतिक संस्थानले उनलाई ‘उत्कृष्ट अभिनेता’ को पुरस्कार प्रदान गरेको थियो।
Discussion about this post