विशेष अनलाइन । संगीत क्षेत्रमा स्थापित नाम हरि लम्साल अब चलचित्र निर्देशनमा पाइला चाल्ने भएका छन्। उनले चलचित्र ‘बा : एक योद्धा’ बाट आफ्नो निर्देशकीय यात्राको श्रीगणेश गरेका हुन्। सोमबार काठमाडौंस्थित पशुपतिनाथ मन्दिर परिसरमा स्क्रिप्ट र क्यामेरा पूजा गर्दै यस चलचित्रको औपचारिक छायांकन सुरु गरिएको छ। यस चलचित्रको कथा तथा पटकथा लेखन पनि निर्देशक लम्साल स्वयंले गरेका हुन्।
आर्टिस्टिक इन्टरटेनमेन्टको ब्यानरमा निर्माण हुन लागेको यो चलचित्रले सन्तानका लागि एक बाबुले गर्ने त्याग, समर्पण र जीवनको संघर्षलाई मुख्य विषयवस्तु बनाएको छ। चलचित्रको प्राविधिक पक्षलाई बलियो बनाउन प्रसिद्ध छायाँकार शिवराम श्रेष्ठलाई अनुबन्ध गरिएको छ। यसअघि ‘पूर्ण बहादुरको सारङ्गी’, ‘बोक्सीको घर’ र ‘परान’ जस्ता ब्लकबस्टर चलचित्रहरू खिचिसकेका श्रेष्ठको संलग्नताले यो चलचित्र दृश्यका हिसाबले निकै उत्कृष्ट बन्ने अपेक्षा गरिएको छ।
यस चलचित्रका निर्माता वसन्त लम्साल हुन्, जो स्वयं एक गायक तथा संगीतकार पनि हुन्। उनले गत वर्ष विपिन कार्की र उपासना सिंह ठकुरीलाई समेटेर एक्सन प्रधान चलचित्र ‘कर्मा’ निर्माण गरेका थिए। यद्यपि ‘कर्मा’ व्यावसायिक रूपमा सफल हुन सकेन, तर ‘बा : एक योद्धा’को कथावस्तु निकै सशक्त लागेकाले आफूले यसमा लगानी गरेको निर्माता लम्सालले बताएका छन्।
रोचक पक्ष के छ भने, चलचित्रको छायांकन सुरु भइसक्दा पनि निर्माण पक्षले मुख्य कलाकारहरूको नाम भने गोप्य नै राखेको छ। दर्शकहरूलाई ‘सरप्राइज’ दिने उद्देश्यले तत्काल कलाकारहरूको नाम सार्वजनिक नगरिएको निर्देशक लम्सालको भनाइ छ। चलचित्रको छायांकन सकिएपछि मात्र ‘फर्स्टलुक’ पोस्टरमार्फत कलाकारहरूको आधिकारिक जानकारी दिइने तयारी गरिएको छ।
Discussion about this post