विशेष अनलाइन । छायांकनको तयारीमा रहेको नेपाली चलचित्र ‘पाँच पाण्डव’ को निर्माण टोली लोकेशन हन्टिङका लागि कोशी प्रदेश आइपुगेको छ। ‘कालिरानी फिल्म्स’को ब्यानरमा निर्माण हुन लागेको यस चलचित्रका लागि उपयुक्त छायांकन स्थलको खोजी गर्दै निर्देशक वसन्त निरौलाको नेतृत्वमा रहेको टोली शनिबार इटहरी आएको हो।
शनिबार इटहरीस्थित इलाईट सिनेमा हलमा पत्रकारहरूसँगको अनौपचारिक भेटघाटका क्रममा निर्माण पक्षले चलचित्रसम्बन्धी प्रारम्भिक जानकारी सार्वजनिक गरेको छ। कमेडी र सामाजिक ड्रामाको मिश्रण रहने यस फिल्ममा नेपाली चलचित्र उद्योगका चर्चित तथा अनुभवी कलाकारहरूको अभिनय रहने निर्माण पक्षले जनाएको छ।
चलचित्रका मुख्य कलाकारहरूमा हरिवंश आचार्य, दीपाश्री निरौला, आर्यन सिग्देल, जितु नेपाल, रजनी गुरुङ र सागर लम्साल (बले) रहेका छन्, जसले दर्शकलाई हलसम्म तान्ने विश्वास गरिएको छ।
निर्देशक वसन्त निरौलाका अनुसार चलचित्रको छायांकन आगामी फागुन १ गतेदेखि सुरु हुनेछ।
कोशी प्रदेशका विभिन्न रमणीय स्थानहरूमा खिचिने यस फिल्मको छायांकन तालिका करिब ४० दिनको रहनेछ। चलचित्रको सम्पूर्ण छायांकन कोशी प्रदेशमै गरिने भए पनि प्रदर्शन मिति भने हालसम्म तय भइसकेको छैन।
इटहरीपछाडि अन्तिम लोकेशन तय गर्न निर्माण टोली झापाको दमक र बिर्तामोडतर्फ प्रस्थान गरेको छ।
लोकेशन हन्टिङमा निर्माता नवीन श्रेष्ठ, निर्देशक वसन्त निरौला, प्रोडक्सन म्यानेजर दिलीप पन्त, डिओपी श्याम तामाङ, आर्ट डाइरेक्टर सन्तोष लामा र मुख्य सहायक निर्देशक दिनेश बहादुर राउतको सहभागिता रहेको छ।
कमेडी र सोसल ड्रामामा रुचि राख्ने दर्शकका लागि ‘पाँच पाण्डव’ ले ठूलो पर्दामा नयाँ अनुभव दिने अपेक्षा निर्माण पक्षको छ।
Discussion about this post