विशेष अनलाइन । थारु संस्कृति र परिवेशलाई मुख्य विषयवस्तु बनाएर निर्माण गरिएको नेपाली चलचित्र ‘बहौरिया’ को नयाँ गीत ‘सिरिरी हावा चल्यो’ सार्वजनिक गरिएको छ। म्युजिक नेपालको आधिकारिक युट्युब च्यानलमार्फत निर्माण पक्षले यस गीतलाई दर्शकमाझ ल्याएको हो।
गीतले चिसो बताससँगै युवा मनमा पलाउने प्रेमिल उमङ्ग र जोबनको उन्मादलाई निकै रोचक र कलात्मक ढंगले प्रस्तुत गरेको छ। “सिरिरी हावा चल्यो, मेरो मन चङ्गा लाग्यो” जस्ता शब्दहरूले युवापुस्ताको भावना र प्रेमको अनुभूतिलाई समेट्न खोजेको देखिन्छ। गीतको भाव र लयले दर्शकलाई एक प्रकारको ताजगी प्रदान गर्ने निर्माण पक्षको विश्वास छ।
गायिका सोनु कुश्मीको सुमधुर स्वर रहेको यस गीतमा चर्चित संगीतकार विकास चौधरीको शब्द र संगीत रहेको छ। गीतमा संगीतको संयोजन र शब्दको छनोटले यसलाई अझ कर्णप्रिय बनाएको छ। थारु परिवेशको सुगन्ध आउने गरी तयार पारिएको यो गीत चलचित्रको एक मुख्य आकर्षणको रूपमा रहने देखिएको छ।
गीतको भिडियोमा चलचित्रका मुख्य कलाकारहरू परशुराम चौधरी, रेणु चौधरी, पुनम चौधरी, वीर चौधरी र ममता चौधरीको अभिनय रहेको छ । सार्वजानिक गितलाइ तुलसी घिमिरे (समर्पण) ले कोरियोग्राफी गरेका हुन्।
परशुराम चौधरीको लेखन तथा निर्देशनमा तयार भएको यस चलचित्रलाई सन्दीप मोटेले छायांकन र सम्पादन गरेका छन्। गीतको दृश्यलाई जीवन्त बनाउन रमेश डी कौशिकले कलर ग्रेडिङको काम गरेका हुन्। रिसन चौधरी, खुस्बु चौधरी र रक्षा चौधरीको निर्माणमा बनेको चलचित्रले थारु कला, संस्कृति र मौलिकतालाई पर्दामा उतार्ने प्रयास गरेको छ।
Discussion about this post