विशेष अनलाइन । राजेश हमालको अभिनय रहेको चलचित्र ‘प्रवासी जीवन’ को पहिलो गीत सार्वजनिक भएको छ। अमेरिकाका रमणीय स्थानहरूमा छायांकन गरिएको ‘ज्यान भो लट्टाई, चङ्गा भो मन’ बोलको गीतलाई निर्माण पक्षले भिडियोसहित बाहिर ल्याएको हो। सार्वजनिक गीतमा प्रताप दासको सुमधुर स्वर रहेको छ भने नवीन कार्कीको संगीत र डिपी खनालका शब्दहरू समावेश छन्।
चलचित्रले उज्ज्वल भविष्यको खोजीमा अमेरिका पुगेका नेपालीहरूको संघर्ष र त्यहाँको वास्तविक जीवनलाई पर्दामा उतारेको छ। श्याम क्षेत्री र राम अधिकारीले संयुक्त रूपमा निर्देशन गरेको यस चलचित्रले प्रवासमा रहेका नेपालीहरूले भोग्नुपर्ने जटिलता र मानसिक स्वास्थ्यका गम्भीर समस्याहरूलाई मुख्य विषयवस्तु बनाएको छ। निर्देशक क्षेत्रीका अनुसार प्रवासमा बस्ने जो कोहीले पनि यस चलचित्रको कथामा आफ्नै प्रतिविम्ब पाउनेछन्।
चलचित्रमा राजेश हमालका साथै सरिता लामिछाने, बुद्धि तामाङ, महादेव त्रिपाठी, एञ्जेला बस्नेत र स्वयं निर्देशक श्याम क्षेत्री लगायतका कलाकारहरूको सशक्त अभिनय देख्न पाइनेछ। गीतको भिडियोमा भने श्याम क्षेत्री, एञ्जेला बस्नेत र लोकेश भित्रीकोटीलाई फिचर गरिएको छ। यस चलचित्रको सम्पूर्ण छायांकन अमेरिकामा नै गरिएको हो, जसले प्रवासी परिवेशलाई अझ वास्तविक बनाएको छ।
श्याम क्षेत्रीकै पटकथा र संवाद रहेको यस चलचित्रलाई रबिन आचार्यले निर्माण गरेका हुन्। ‘सिजल एण्ड सिस्टर फाउन्डेसन फर नेपाल’ सँगको सहकार्यमा निर्माण भएको यस चलचित्रलाई श्याम क्षेत्री प्रोडक्सन र नेसनल मिडिया प्रोडक्सनले बजारमा ल्याउन लागेका हुन्। प्रवासी नेपालीहरूको कथा बोकेको यो चलचित्र आगामी १५ फागुनदेखि देशभरका सिनेमा हलहरूमा प्रदर्शन हुने तयारीमा छ।
Discussion about this post