विशेष अनलाइन । लोकप्रिय कलाकार मरिचमान श्रेष्ठ ‘बल्छी धुर्बे’ ले आफ्नो निर्देशन र अभिनय रहेको नयाँ चलचित्र ‘गोबर गणेश’ को प्रचारप्रसारका लागि निकै रचनात्मक र अनौठो शैली अपनाएका छन्। दर्शकको ध्यान खिच्न उनले सडकमा गुड्ने ‘जहाज’ को आकृति बनाएर प्रचार अभियान सुरु गरेका हुन्।
पाइलट र एअर-होस्टेसको अवतारमा कलाकार यो रोचक प्रचारयात्रामा मरिचमानलाई अभिनेत्री पूजन घिमिरेले साथ दिइरहेकी छिन्। मरिचमान पाइलट र पूजन एअर-होस्टेसको पोसाकमा सडकमा निस्किएर सर्वसाधारणसँग प्रत्यक्ष भेटघाट गरिरहेका छन्। गुडिरहेको जहाजको आकृति र कलाकारहरूको यो नौलो अवतारले सडकमा हिँड्ने मानिसहरूको ध्यान मात्र खिचेको छैन, सामाजिक सञ्जालमा पनि चर्चा बटुलिरहेको छ।
घरदैलोमै पुग्ने लक्ष्य निर्देशक तथा अभिनेता मरिचमानका अनुसार ‘गोबर गणेश’ बारे हरेक व्यक्ति र स्थानसम्म जानकारी पुगोस् भन्ने उद्देश्यले यो शैली अपनाइएको हो। “हामी दर्शकको नजिकै पुगेर चलचित्रबारे जानकारी दिन चाहन्छौँ, त्यसैले हलभित्र छिर्नुअघि सडकबाटै उहाँहरूलाई निमन्त्रणा गरिरहेका छौँ,” उनले भने।
माघ १ देखि प्रदर्शन ग्रामीण परिवेश र सामाजिक व्यङ्ग्यलाई मुख्य विषयवस्तु बनाएको यस चलचित्रमा मरिचमान श्रेष्ठ र बर्षा सिवाकोटी मुख्य भूमिकामा छन्। चलचित्रले गाउँले जीवनको यथार्थलाई रमाइलो शैलीमा प्रस्तुत गर्ने बताइएको छ। ‘गोबर गणेश’ आगामी माघ १ गते (मकर संक्रान्ति) देखि देशभरका सिनेमा घरहरूमा प्रदर्शन हुने तयारीमा छ।
Discussion about this post