विशेष अनलाइन । बालबालिकाहरूको अन्तरनिहित प्रतिभा प्रस्फुटन गर्ने उद्देश्यले आयोजित ‘मिस्टर एण्ड मिस लिटिल पूर्वेली’ को दोस्रो संस्करण भव्यताका साथ सम्पन्न भएको छ। ओपन स्पेस प्रालीको आयोजनामा शनिबार इटहरीस्थित दुर्गा पार्टी प्यालेसमा भएको ग्राण्ड फिनालेमा सिनियर र जुनियर दुवै विधामा विजेताहरू घोषित गरिएका हुन्।
कोशी प्रदेशका पर्यटन, वन तथा वातावरण मन्त्री भीम पराजुलीको प्रमुख आतिथ्यतामा सम्पन्न उक्त कार्यक्रममा विभिन्न चरणको कडा प्रतिस्पर्धा पार गर्दै आर्यक ओझा र योदिन गुरुङले उपाधि चुमेका छन्। निर्णायकहरूको मूल्याङ्कन र प्रतिभा प्रस्तुतीका आधारमा बालबालिकाहरूले विभिन्न विधामा सफलता हासिल गरे।
प्रतियोगिताको जुनियर क्याटागोरी तर्फ साङ्केनमा राई फर्स्ट रनर अप, काव्या कार्की सेकेन्ड रनर अप र आरोही राउत थर्ड रनर अप घोषित भए। सोही विधामा लुना फुयालले ‘पब्लिक च्वाइस’ र इतिश कट्टेलले ‘अर्गनाइजर च्वाइस’ को उपाधि जिते।
त्यसैगरी, सिनियर क्याटागोरी तर्फ लारेसा जिमी फर्स्ट रनर अप, शाइना गुरुङ सेकेन्ड रनर अप र संरक्षण दाहाल थर्ड रनर अप बन्न सफल भए। सिनियर तर्फ नै प्रशंसा कट्वालले ‘पब्लिक च्वाइस’ र आरजु रौतेरले ‘अर्गनाइजर च्वाइस’ को अवार्ड हात पारे।
प्रतियोगिताको निष्पक्ष मूल्याङ्कनका लागि निर्णायक मण्डलमा म्यान अफ द वर्ल्ड २०२५ का प्रकाश चौहान, मिस नेपाल आइडल २०१८ की विजेता मेरिना तुम्सा लिम्बू, बैंकर दीपिका भट्टराई र ग्रेस इन्टरनेसनल इटहरीका एकेडेमिक हेड रेजन राई रहेका थिए।
सीता पुरी र शुभेच्छा कार्कीले सञ्चालन गरेको उक्त कार्यक्रम ओपन स्पेस प्रालीका सिइओ सजिना श्रेष्ठको नेतृत्व र सरोज श्रेष्ठको निर्देशनमा सम्पन्न भएको थियो। कार्यक्रमको कोरियोग्राफी शुभेच्छा कार्कीले गरेकी थिइन् भने मिडिया कोअर्डिनेटरको भूमिकामा सुवास संकल्प रहेका थिए। कार्यक्रमका अतिथिहरूले बालबालिकाहरूको व्यक्तित्व विकास र आत्मविश्वास बढाउन यस्ता मञ्चहरूले महत्त्वपूर्ण भूमिका खेल्ने धारणा राखेका थिए।
Discussion about this post