विशेष अनलाइन । प्रेम सोनी सुनारको कथा तथा निर्देशनमा तयार भएको चलचित्र ‘गुरु आमा’ को पहिलो गीत ‘सम्झना साँचौँला’ सार्वजनिक गरिएको छ। बिहीबार काठमाडौँमा आयोजित एक विशेष कार्यक्रमका बीच निर्माण पक्षले यो गीत सार्वजनिक गरेको हो। आगामी वैशाख २५ गतेबाट प्रदर्शनको तयारीमा रहेको यस चलचित्रको सार्वजनिक गीतमा ममता गुरुङ र मोहन नेपालीको स्वर, प्रेम सोनी सुनारको शब्द तथा बीबी अनुरागीको संगीत रहेको छ।
एकेन्द्र सारा शंकरको कोरियोग्राफीमा बनेको गीतको भिडियोमा मिथिला शर्मा, पूजा शर्मा, बुद्धि तामाङ र प्रेम सोनी सुनार लगायतका कलाकारहरूको नृत्य देख्न सकिन्छ। विद्यालयको वनभोजको परिवेशमा तयार पारिएको भिडियोले शिक्षक-शिक्षिका र विद्यार्थीहरूबीचको रमाइलो र मित्रवत् सम्बन्धलाई आकर्षक ढंगले चित्रण गरेको छ। अभिनेत्री पूजा शर्मा भने यस चलचित्रको यस गीतमा मात्र विशेष भूमिकामा देखिने बुझिएको छ।
गीत रिलिज कार्यक्रममा बोल्दै अभिनेत्री मिथिला शर्माले यो चलचित्र विद्यार्थीदेखि शिक्षक-शिक्षिकासम्मको कथामा आधारित रहेको जानकारी दिनुभयो। उहाँले चलचित्रमा कुनै बनावटी तामझम नभएको र समाजकै आफ्नै भोगाइहरूलाई समेटिएको बताउनुभयो। विद्यालय, विद्यार्थी, अभिभावक र शिक्षकको सम्बन्धलाई मुख्य आधार बनाइएकाले यस चलचित्रको मुख्य ‘स्टार’ नै यसको बलियो विषयवस्तु रहेको उहाँको दाबी छ।
यस चलचित्रमा मिथिला शर्माका साथै गौरी मल्ल, बुद्धि तामाङ, सुशील पोखरेल, ध्रुव कोइराला, उत्तम के.सी र राधिका हमाल लगायतका कलाकारहरूको अभिनय देख्न पाइनेछ। सुशील पंगेनीले लेखन गरेको यस चलचित्रलाई शेरबहादुर तामाङ र मिराज अर्यालले छायांकन गरेका हुन् भने मित्र देव गुरुङले सम्पादनको जिम्मेवारी सम्हालेका छन्।
सीता विश्वकर्मा र प्रेम सोनी सुनार निर्माता रहेको यस चलचित्रले नेपाली शैक्षिक र सामाजिक परिवेशलाई पर्दामा उतार्ने प्रयास गरेको छ।
Discussion about this post