विशेष अनलाइन । लामो समयदेखि पर्दा पछाडि सक्रिय रहेका प्रदीपकुमार चौधरीले चलचित्र ‘तरङ्ग’ मार्फत निर्देशनमा डेब्यु गर्ने भएका छन्। देवदत क्रियशनको ब्यानरमा निर्माण भएको यस चलचित्रको आइतबार पहिलो पोस्टर सार्वजनिक गरिएको हो। यस पोस्टरले चलचित्रको मुख्य कलाकार र त्यसको भावलाई स्पष्टसँग प्रस्तुत गरेको छ।
पोस्टरमा कलाकारद्वय वरुण अधिकारी र रविना केसीको केमेस्ट्रीलाई प्राथमिकता दिइएको छ। पोस्टरमा देखिएको उनीहरूको लुक्सले चलचित्र प्रेमीहरूको ध्यान तानेको छ। यो चलचित्रमा वरुण र रविनासँगै ठुलो सङ्ख्यामा अनुभवी र नयाँ कलाकारहरूको संगम रहेको छ, जसमा बारात लिम्बु, सारा राई र बाल कलाकार प्रन्शु चौधरी समेत समेटिएका छन्।
एवी फिल्मीसँगको सहकार्यमा तयार भएको चलचित्रमा मनोज थापा मगर, पवन गिरी र मनोज महतोको संगीत सुन्न सकिनेछ। निर्देशक चौधरी स्वयंको कथा रहेको ‘तरङ्ग’मा तर्कराज जोशी र जितेन्द्रकुमार चौधरीले लगानी गरेका छन् भने हरिनारायण चौधरी कार्यकारी निर्माता हुन्। पार्श्व ध्वनीमा सुशील डंगोल र सुदीप श्रेष्ठले काम गरेका छन्।
यो चलचित्र विशेषगरी ‘सुपर नेचुरल’ विधामा आधारित रहेकाले नेपाली चलचित्र बजारका लागि नौलो प्रयोग हुन सक्छ। छायाङ्कनका लागि नेपालका विभिन्न भौगोलिक क्षेत्रहरू प्रयोग गरिएकाले पर्दामा दृश्यको विविधता देखिने पक्का छ। निर्माण व्यवस्थापनको जिम्मेवारी रिजन परियारले सम्हालेका छन्।
प्रचारको पहिलो पाइला स्वरूप पोस्टर सार्वजनिक गरिएको र अबको केही दिनमै हलमा लाग्ने मिति तय गरिने निर्देशकले जानकारी दिएका छन्। यसै साता आधिकारिक रिलिज डेट सार्वजनिक भएपछि चलचित्रको ट्रेलर र गीतहरू पनि क्रमैसँग रिलिज हुने तयारीमा छन्।
Discussion about this post