विशेष अनलाइन । नेपाली चलचित्र क्षेत्रमा भारतीय चलचित्रको प्रभाव र नक्कल गर्ने प्रवृत्ति नयाँ होइन। यसैको पछिल्लो उदाहरणका रूपमा चलचित्र ‘मालती मङ्गले’ देखिएको छ। हालै युट्युबमार्फत सार्वजनिक गरिएको यस चलचित्रको ‘ढुङ्गामाथि लेऊ’ बोलको गीतमा अभिनेता विजय बराललाई बलिउड सुपरस्टार शाहरुख खानको चर्चित ‘मोहब्बतें’ अवतारमा प्रस्तुत गरिएको छ। सन् २००० को उक्त चर्चित बलिउड चलचित्रमा शाहरुखले काँधमा स्वीटर राखेर भायोलिन बजाएको दृश्यलाई यहाँ हुबहु नक्कल गरिएको देखिन्छ।
गीतको भिडियोमा विजय बराललाई भायोलिनसहित शाहरुख खानको ‘ट्रेडमार्क पोज’मा देख्न सकिन्छ। कोरियोग्राफर रोशन विकले उनलाई दुई हात फिजाउने शैलीमा प्रस्तुत गरेका छन्, जसले गर्दा निर्माण पक्षको उद्देश्य विजयलाई शाहरुखकै स्वरूपमा ढाल्ने रहेको प्रस्ट हुन्छ। यो दृश्य सार्वजनिक भएसँगै सामाजिक सञ्जाल र चलचित्र वृत्तमा नेपाली चलचित्रमा बढ्दो विदेशी प्रभावबारे पुनः बहस सुरु भएको छ।
यस विषयमा चलचित्रका निर्माता एवं गायक रामकृष्ण ढकालले स्पष्टीकरण समेत दिएका छन्। उनका अनुसार चलचित्रको कथाको मागबमोजिम नै यसो गरिएको हो। कथामा अभिनेत्री वर्षा राउतको पात्रले विजयको पात्रभित्र शाहरुख खानको छवि देख्ने कल्पना गरेकाले गीतमा मात्रै सो शैली समावेश गरिएको उनले बताएका छन्। यद्यपि, पूरा चलचित्रमा भने विजय शाहरुखको शैलीमा नदेखिने उनले स्पष्ट पारेका छन्।
हर्क साउदको शब्द र एसडी योगीको संगीत रहेको यस गीतमा रामकृष्ण ढकाल र ऋतिका श्रेष्ठको स्वर सुन्न सकिन्छ। गीतमा विजय र वर्षालाई रोमान्टिक जोडीका रूपमा प्रस्तुत गरिएको छ, जहाँ उनीहरू श्रीमान्–श्रीमतीको भूमिकामा छन्। अर्जुन तिवारीले छायांकन गरेको यस भिडियोको संगीत संयोजन रिकेश गुरुङले गरेका हुन्।
प्रकु पाण्डेयको निर्देशनमा तयार भएको यस चलचित्रमा विजय र वर्षाका साथै प्रकाश घिमिरे, सरिता गिरी, मेक्सम गौडेल लगायतका कलाकारहरूको अभिनय रहेको छ। सागर ज्ञवाली कार्यकारी निर्माता रहेको यो चलचित्र आगामी वैशाख २५ गतेबाट देशभरका सिनेमाघरमा प्रदर्शन हुने तयारीमा छ। निर्देशक पाण्डेय स्वयंको कथा रहेको यस चलचित्रको पटकथा भने संयोग गुरागाईँले तयार पारेका हुन्।
Discussion about this post