विशेष अनलाइन । माघ २३ गतेदेखि नेपालभर प्रदर्शन हुन लागेको चलचित्र ‘कुमारी’ अब विदेशका विभिन्न देशहरूमा पनि प्रदर्शन हुने भएको छ। निर्माण पक्षका अनुसार यो चलचित्र अस्ट्रेलिया, अमेरिका, क्यानडा र मध्यपूर्वका देशहरूमा प्रदर्शन गर्नका लागि सम्झौता भइसकेको छ। निर्माता महेन्द्र अधिकारीले यी देशहरूमा चलचित्र देखाउने अधिकार बिक्री भइसकेको जानकारी दिए।
चलचित्रको ट्रेलर सार्वजनिक भएपछि दर्शकहरूले निकै मन पराएका छन्। ट्रेलरलाई मिलेको राम्रो प्रतिक्रिया र दर्शकको बढ्दो चाहनाका कारण अन्य देशहरूबाट पनि प्रदर्शनका लागि माग आइरहेको निर्माताले बताएका छन्। विदेशमा रहेका नेपालीहरूले आफ्नै भाषाको चलचित्र हेर्न पाउने गरी विभिन्न कम्पनीहरूसँग सहकार्य गरिएको छ।
चलचित्रलाई दिनेश राउतले निर्देशन गरेका हुन्। ‘कुमारी’ मार्फत नयाँ कलाकारहरू अभिषेक खड्का र आकृति राजभण्डारीले अभिनय यात्रा सुरु गर्दैछन्। उनीहरूको साथमा घनश्याम जोशी, सुनिता श्रेष्ठ, आकाङ्क्षा कार्की लगायतका कलाकारहरूको अभिनय रहेको छ। विनिश इन्टरटेन्मेन्टको ब्यानरमा बनेको यस चलचित्रमा केदार भुसाल कार्यकारी निर्माता हुन्।
चलचित्रको कथा विकास सुवेदीले लेखेका हुन् भने यसलाई सुसन प्रजापतिले खिचेका हुन्। उत्कृष्ट साउन्ड र सम्पादनका साथ तयार पारिएको यो चलचित्रले स्वदेशमा मात्र नभई विदेशमा बस्ने नेपालीहरूको पनि मन जित्ने विश्वास निर्माण टोलीले लिएको छ।
Discussion about this post