विशेष अनलाइन । चलचित्र ‘आ बाट आमा’ यही माघ १६ गतेबाट देशभरका हलहरूमा प्रदर्शनमा आउँदैछ। चलचित्रको प्रचारलाई प्रभावकारी बनाउन निर्माण पक्षले देशका विभिन्न सहरमा सांगीतिक यात्रा सुरु गरेको छ।
सांगीतिक यात्राको सुरुवात मंगलबार साँझ ५ बजे पोखराको लेकसाइडबाट गरिएको छ। पोखरापछि बुधबार चितवन र माघ १५ गते बिहीबार काठमाडौंको गोंगबुस्थित सिटी स्क्वायर मलमा विशेष कार्यक्रम हुने आयोजकले जनाएको छ।
यी कार्यक्रमहरूमा चलचित्रका मुख्य कलाकारहरू विपना थापा, प्रदीप रावत (गजनी भिलेन), पल शाह, साइग्रेस पोखरेल, उषा उप्रेती र सिम्रन पन्त सहभागी हुनेछन्। साथै गायक करण परियारले पनि आफ्नो सांगीतिक प्रस्तुति दिनेछन्।
आमा र छोराको भावनात्मक सम्बन्धमा आधारित यो चलचित्रले सेन्सर बोर्डबाट ‘युनिभर्सल सर्टिफिकेट’ प्राप्त गरेको छ। यो सर्टिफिकेट पाएसँगै अब यो चलचित्र सबै उमेरका दर्शकले आफ्नो परिवारसँग बसेर हेर्न पाउनेछन्।
चन्द्र पन्तको निर्देशनमा बनेको चलचित्रको रनटाइम २ घन्टा ४० मिनेट रहेको छ। चलचित्रमा कोशिस क्षेत्री, बाबुल गिरी र थानेश्वर गौतमको संगीत तथा नवराज उप्रेतीको छायांकन रहेको छ।
चलचित्रलाई कृष्ण प्रसाद सुवेदी, ओमकार पन्त, प्रकाशजंग कुँवर, ध्रुव प्रसाद न्यौपाने र क्षितिज ढुंगानाले मिलेर निर्माण गरेका हुन्। हाल सार्वजनिक भएको गीत र ट्रेलरले दर्शकमाझ राम्रो उत्साह बढाएको छ।
Discussion about this post