विशेष अनलाइन । नेपाली संगीत क्षेत्रमा सुमधुर स्वरका पर्याय शिव परियारको आवाजमा सजिएको नयाँ गीत “अजम्बरी माया” सार्वजनिक भएको छ। गहिरो प्रेमभाव, समर्पण र भावनात्मक आरोह-अवरोह बोकेको यस गीतले दर्शकसामु एउटा न्यानो अनुभूति ल्याइदिएको छ।
तर यस गीतको केन्द्रमा छन् – माधव के.सी. र मेनुका माझी। अभिनयको दुनियाँमा अनुभव र भावनाको गहिराइ दुबै प्रस्तुत गर्न सक्ने यी दुई कलाकारले “अजम्बरी माया” लाई केवल गीत नभई प्रेमको चलचित्रीय कथा बनाइदिएका छन्। उनीहरूको आँखाबाट बोल्ने संवाद, मौनतामा पोखिएको भावना र प्रेमको अभिव्यक्तिले गीतलाई आत्मासम्म छुने बनाएको छ।
माधव के.सी., जो सदाबहार प्रेम पात्रको रूपमा प्रस्तुत भएका छन्, उनको हावभाव, मौनता र भाव भंगिमा नै प्रेमको परिभाषा बनेको छ। उता मेनुका माझीको सौम्यता, संकोच र समर्पणले गीतमा स्त्री हृदयको गहिराइ उतारेको छ। दुबै कलाकारको जोडीले यस्तो स्वाभाविक र सशक्त प्रेम कथा बोलेका छन्, जसले दर्शकको हृदयमा लामो समयसम्म बसिरहनेछ।
गीतको निर्देशनमा छन् – नवल नेपाल। निर्देशनमा एक बेग्लै परिपक्वता बोकेका नवलले प्रेम, पीडा र सन्देहका सूक्ष्म भावनाहरूलाई अद्भुत दृश्य र कथा शैलीमा पस्किएका छन्। उनले प्रयोग गरेको “सिनेम्याटिक लय” ले गीतलाई एक चलचित्रजस्तै बनाएको छ, जसले दृश्य र भावनाको गहिरो मेल ल्याएको छ।
गीतको शब्द रचना डॉ. राजु बाबु श्रेष्ठको कलमबाट बगेको हो भने, संगीत सिर्जना अनिश श्रेष्ठको प्रतिभाबाट जन्मिएको हो। आमोस तामाङको संगीत संयोजनले गीतमा आत्मीयता थपेको छ।
मदन कश्यप घिमिरेको क्यामेरा सधैंझैँ कलात्मक छ भने मित्र डी. गुरुङको सम्पादनले कथा प्रवाहलाई सशक्त बनाएको छ। देवराज सिग्देल, सुदीप पाण्डे, अशोक मण्डल, मनिष र अजय चौधरी, सुरज थापा मगर, शान्ति खाजा घर, कालश कुटुर एण्ड बुटिक, मन्दिरा बुटिक लगायत सम्पूर्ण प्राविधिक टोलीको समर्पण पनि उल्लेखनीय छ।
Discussion about this post