सुजन चापागाईं र झुमा लिम्बुको स्वरमा ‘ऊनको स्वीटर’को गीत ‘काफ्ले’ सार्वजनिक

विशेष अनलाइन । नवीन चौहानको डेब्यु निर्देशन चलचित्र ‘ऊनको स्वीटर’ को नयाँ गीत ‘काफ्ले’ सार्वजनिक गरिएको छ। झुमा लिम्बु र सुजन चापागाईंको स्वर, संगीत र प्रस्तुति रहेको गीतले दर्शक-श्रोतामाझ छोटो समयमा लोकप्रियता बटुल्दै गएको छ।

गीत वैशाख २६ (मे ९) मा प्रदर्शनमा आउने चलचित्रको प्रचारप्रसार अन्तर्गत आज सार्वजनिक गरिएको हो। ऊनको स्वीटर मा विपिन कार्की र मिरुना मगरको मुख्य भूमिका रहेको छ। ‘काफ्ले’ गीतमा उनीहरूबीचको प्रेम, ठट्टा र रमाइलो भावनालाई समेटिएको छ। गीतको शब्द युबराज काफ्लेले लेखेका हुन् भने संगीत झुमा लिम्बुले तयार पारेकी हुन्। गीतकार कफ्ले इटहरी निवासी हुन्  ।

बज्र क्रिएसन रेकर्ड्समा रेकर्ड गरिएको यस गीतमा कोबिद बज्राले संगीत निर्देशन गरेका छन्। भिडियो निर्देशन गायक सुजन चापागाईंले गरेका हुन्।

चलचित्र वैशाख २६ गतेबाट नेपालसहित विश्वभर एकैसाथ प्रदर्शनमा आउँदैछ। ‘ऊनको स्वीटर’ले सामान्य जीवनका भावनात्मक कथा, सरलता र प्रेमलाई केन्द्रबिन्दुमा राखेको बताइएको छ।

चलचित्रमा विपिन कार्की र मिरुना मगरसँगै सुनिल पोखरेल, माओत्से गुरुङ, विल्सन विक्रम राई, प्रेम सुब्बा लगायतका कलाकारको अभिनय रहेको छ।

चलचित्रलाई आर्टमन्डुले निर्माण गरेको हो भने वितरण काफिया फिल्म्स (काठमाडौं उपत्यका भित्र) र कुबेर सिने डिस्ट्रीब्युसन (उपत्यका बाहिर) ले गर्दै छन्। अन्तर्राष्ट्रिय वितरणमा जापान, दक्षिण कोरिया, अमेरिका लगायतका देशहरूका संस्थाहरू संलग्न छन्।

गीत सार्वजनिक भएसँगै दर्शकले सामाजिक सञ्जालमा सकारात्मक प्रतिक्रिया दिएका छन्। धेरैले सुजन चापागाईंको आवाज र झुमा लिम्बुको संगीत संयोजनलाई प्रशंसा गरेका छन्।