विशेष अनलाइन । मोरङको हरैँचाबाट नेपाली कला क्षेत्रमा उदाएका प्रतिभावान कलाकार सविन कट्टेल यतिबेला रङ्गमञ्च र चलचित्र दुवै क्षेत्रमा आफ्नो दरिलो उपस्थिति जनाउन व्यस्त छन्। ३४ वर्षको उमेरमा ४५-५० वर्षको पाको र जीवनले ठक्कर खाएको विक्षिप्त पात्रलाई पर्दामा उतार्न सक्ने उनको यो अचम्मको रूपान्तरण नै मुख्य कला हो। यो स्वाभाविक अभिनय रातारात सम्भव भएको भने होइन; यसको पछाडि रङ्गमञ्चमा पसिना बगाएको १२ वर्ष लामो कठोर यात्रा र अनुभव लुकेको छ।
सविनको यो लामो सङ्घर्षको फल यतिबेला फागुन २९ गतेबाट प्रदर्शनमा आउन लागेको चलचित्र ‘लालिमा’ मार्फत देखिँदैछ। यस चलचित्रमा उनले आफ्नो वास्तविक उमेरभन्दा झण्डै दोब्बर उमेरको एक सामान्य गाउँलेको चरित्र निर्वाह गरेका छन्। प्राकृतिक विपत्तिमा आफ्नो सर्वस्व गुमाएको र एक्लोपनमा बाँचेको यो पात्रले नै चलचित्रको कथामा ठूलो ‘ट्विस्ट’ ल्याउने सविन बताउँछन्। भर्खरै सार्वजनिक भएका पोष्टर र टिजरमा उनको गेटअप र अभिनयको निकै चर्चा भइरहेको छ।
वि.सं. २०७० सालमा ‘हारजित’ नाटकबाट औपचारिक रूपमा रङ्गमञ्चीय यात्रा सुरु गरेका सविनले हालसम्म १५ भन्दा बढी नाटकहरूमा आफ्नो अभिनय क्षमता पस्किसकेका छन्। ‘छिमेकी’, ‘माधवी’, ‘सखी’, ‘अग्निचक्षु’ र ‘मुनामदन’ जस्ता चर्चित नाटकहरूमा उनले कहिले कलाकार त कहिले निर्देशकको रूपमा काम गरेका छन्। शिल्पी थिएटरमार्फत देशका विभिन्न गाउँ र सहरहरूमा पुगेर जनचेतनामूलक ‘मुक्त रङ्गमञ्च यात्रा’ मा सहभागी हुनुले पनि उनको अभिनयलाई थप परिष्कृत बनाएको हो।
अभिनयमा निखारता ल्याउन हरप्रहर सङ्घर्ष गरिरहेका कारण उनले थुप्रै अफरहरू आउँदा पनि चलचित्रलाई पर्याप्त समय दिन सकिरहेका थिएनन्। करिब ७ वर्षअघि ‘मिस्टर भर्जिन’ बाट चलचित्रमा डेब्यु गरेका उनले ‘कोशेढुंगा’ मा पनि काम गरेका छन्। हाल उनी भुवन केसीको निर्देशन तथा अनमोल केसीको मुख्य अभिनय रहेको बहुप्रतीक्षित चलचित्र ‘बाटुलो जुन’ को छायांकनमा व्यस्त छन्।
सविनले अभिनयको क्षेत्रलाई केवल पर्दामा मात्र सीमित नराखी नयाँ पुस्तालाई सिकाउने काम पनि गर्दै आएका छन्। विभिन्न नाटक वर्कसपहरूमा प्रशिक्षकको भूमिका निभाउनु र पठाओ तथा माया आइभिएफ जस्ता चर्चित कमर्सियल विज्ञापनहरूमा काम गर्नुले उनको बहुआयामिक व्यक्तित्व झल्काउँछ। यसका साथै ‘रातो पछ्यौरी’ नामक डकु-ड्रामामा समेत उनले आफ्नो सशक्त अभिनय कौशल प्रदर्शन गरिसकेका छन्।
आगामी दिनमा अन्य नयाँ चलचित्रहरूको लागि पनि कुराकानी भइरहेको बताउने सविन आफूलाई एक असल र अब्बल कलाकारको रूपमा स्थापित गर्न चाहन्छन्। रङ्गमञ्चमा खारिएर चलचित्रको संसारमा छिरेका सविनको यो समर्पणले नेपाली चलचित्र क्षेत्रले एउटा सम्भावना बोकेको सशक्त अभिनेता पाएको छ।
Discussion about this post