विशेष अनलाइन । किराँत चलचित्रकर्मी सङ्घले आज (शुक्रबार) धरानमा ‘कोशी प्रदेश कलाकार सम्मान कार्यक्रम–२०८२’ भव्यताको साथ सम्पन्न गरेको छ। केन्द्रिय कार्यालय धरानमा रहेको यस सङ्घले लांघाली सामुदायिक वनको सभाहलमा विशेष समारोह आयोजना गर्दै प्रदेशभर सक्रिय कलाकर्मीहरूलाई उच्च सम्मान प्रदान गरेको हो।
सङ्घका अध्यक्ष सागर सिङ्गल सुब्बाको सभापतित्वमा सम्पन्न भएको कार्यक्रममा कोशी प्रदेशको चलचित्र, कला र संस्कृतिको उन्नयनमा उल्लेखनीय योगदान पुर्याइरहेका स्थापित तथा उदयीमान कलाकारहरूको योगदानलाई स्मरण गर्दै हौसलाका शब्दहरू बाँडिएका थिए।
कार्यक्रमका प्रमुख अतिथि, नेपाल चलचित्रकर्मी महासंघ कोशी प्रदेश अध्यक्ष अरुण कुमार प्रधान, विशिष्ट अतिथि रङ्गकर्मी तथा समाजसेवी शशी थापा सुब्बा, निर्देशक तथा कलाकार लाखमान योञ्जन, विजय संयोग सुब्बा, सन्तोष सरकार, समाजसेवी लालबहादुर नाल्बो, युवा नेता सन्दीप श्रेष्ठ, केशव रायमाझी र हेमन्त बुडाथोकीलगायत सम्मानित व्यक्तित्वहरूको उपस्थिति रह्यो।
त्यसैगरी, अभिनेता सानुबाबा सुब्बा, कमेडी गायक श्रीकृष्ण लुइटेल, निर्देशक विनोद पुडासैनी, निर्देशक प्रकाश सुब्बा, द्वन्द्व निर्देशक आरजे भिलेनसहित कोशी प्रदेशका थुप्रै सांस्कृतिक तथा चलचित्रकर्मीहरू कार्यक्रमका साक्षी बने।
प्रमुख अतिथि प्रधानले कोशी प्रदेशको चलचित्र उद्योगलाई सबल बनाउन महासंघले गरिरहेको प्रयासको प्रशंसा गर्दै स्थानीय तहबाटै उत्पन्न हुने प्रतिभाहरूलाई संरक्षण र प्रवर्धन गर्न नीतिगत सहयोग आवश्यक रहेको उल्लेख गरे। उनले प्रदेश सरकार र स्थानीय निकायबीच सुदृढ समन्वय हुन सके नेपाली चलचित्र उद्योगले नयाँ उचाइ हासिल गर्ने विश्वास व्यक्त गरे।
सभापति सागर सिङ्गल सुब्बाले किराँती भाषा, कला र संस्कृतिको जगेर्ना अब विकल्प नभई कर्तव्य बनेको बताउँदै सबै किराँती कलाकार, पत्रकार र स्रष्टाहरूलाई एकता र पहिचानको आन्दोलनमा हातेमालो गर्न आग्रह गरे।उनले किराँती संस्कृति समृद्ध बनाउन चलचित्रजगत महत्वपूर्ण माध्यम भएको भन्दै सङ्घ यस दिशामा अझ मजबुत रूपमा अघि बढ्ने प्रतिबद्धता जनाए।
किराँत चलचित्रकर्मी सङ्घले आयोजना गरेको यो सम्मान समारोहले प्रदेशको चलचित्र बजारलाई उर्जा दिँदै नयाँ पुस्ताका कलाकारहरूलाई आत्मविश्वास प्रदान गरेको छ। कलाकारबीचको सद्भाव, सांस्कृतिक एकता र पेशागत सम्मानलाई बलियो बनाउने उद्देश्यका साथ सम्पन्न कार्यक्रमलाई सहभागीहरूले अत्यन्त सफल र अनुकरणीय भएको प्रतिक्रिया दिएका छन्।
सभापति सुब्बाले आगामी दिनमा पनि यस्ता रचनात्मक, प्रेरणादायी र कलाकारमैत्री कार्यक्रमहरूलाई निरन्तरता दिइने घोषणा गरे।
Discussion about this post