बहुप्रतीक्षित चलचित्र ‘अभिमन्यु : च्याप्टर–१’ मंसिर १८ गते बाट प्रदर्शनमा आउने

विशेष अनलाइन। बहुप्रतीक्षित नेपाली चलचित्र ‘अभिमन्यु : च्याप्टर–१’ को नयाँ र निश्चित प्रदर्शन मिति घोषणा गरिएको छ। पटक पटक विभिन्न कारणले मिति सर्दै आएको यस चलचित्र अब आगामी मंसिर १८ गते देशभरका सिनेमा घरहरूमा रिलिज हुने भएको छ।

चलचित्रको निर्माण युनिटले नयाँ पोस्टर सार्वजनिक गर्दै जानकारी गराएको हो। यसअघि जेनजी आन्दोलन, देशमा आएको बाढी पहिरोको प्रकोप, तथा बक्स अफिसमा अन्य चलचित्रहरूको बाक्लो लाइनअपका कारण चलचित्र पूर्व निर्धारित मितिहरूमा प्रदर्शन हुन सकेको थिएन।

सार्वजनिक गरिएको पोस्टरमा चलचित्रका मुख्य कलाकारहरूको बाक्लो उपस्थिति देख्न सकिन्छ। पोस्टरमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, र शिशिर वाङ्देल लाई फिचर्ड गरिएको छ।

चलचित्रका निर्माता विनोद पौडेल ले अबको मिति फाइनल गरिएको बताउँदै यसमा सबैको सल्लाह र सुझावको भूमिका रहेको स्पष्ट पारेका छन्। “हामीले अब मंसिर १८ गते प्रदर्शनमा आउने निर्णय गर्‍यौँ,” पौडेलले भने, “सबैको सहयोगको अपेक्षा गरेका छौँ।”

सुशान्त गौतमले निर्देशन गरेको चलचित्रमा विनोद पौडेल र गुञ्जन गिरी निर्माताको रूपमा रहेका छन्। रमेश चौलागाईं र हरि श्रेष्ठ सह–निर्माता छन् भने विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ कार्यकारी निर्माता रहेका छन् ।