विशेष अनलाइन । नेपाली चलचित्र ‘कल्ली’ यही फागुन १ गतेदेखि देशभर प्रदर्शनमा आउने भएको छ। सौगात मल्ल, बेनिशा हमाल, नाजिर हुसेन, अर्पण थापा, वर्षा राउत, उत्तम प्रधान, सुलक्षण भारती लगायत कलाकारको अभिनय रहेको यो चलचित्र नेपाली र हिन्दी भाषामा निर्माण गरिएको हो।
निर्माता किरण नेपालीका अनुसार चलचित्र नेपाल, भारत र पाकिस्तानमा एकै साथ रिलिज हुनेछ। नेपालमा नेपाली भाषामा र भारत तथा पाकिस्तानमा हिन्दी भाषामा रिलिज गरिनेछ। नेपालमा भने हिन्दी संस्करण प्रदर्शनमा आउने छैन।
चलचित्र भारतमा एम.के. फिल्म डिस्ट्रिब्युटर र पाकिस्तानमा हिप्पो फिल्म्स ले वितरण गर्नेछन्। नेपालमा काफिया फिल्म्स र कुबेर फिल्म्स ले वितरण गर्नेछन्।
‘कल्ली’ को फस्टलुक सार्वजनिक भएसँगै यसको चर्चा चुलिएको छ। लोभले मानिसको जीवनमा पार्ने असरको कथामा आधारित चलचित्रको लेखन तथा निर्देशन लक्ष्मण सुनारले गरेका हुन्। पटकथा महेश दवाडीले तयार पारेका हुन्।
लेकाली इन्टरटेन्मेन्ट प्रा.लि. र कस्तुरी प्रोडक्सन को संयुक्त प्रस्तुति रहेको यो चलचित्रमा आशिष अविरल, सरिता राई र केतन क्षेत्रीको संगीत समावेश छ। चलचित्र हाल पोस्ट-प्रोडक्सनको अन्तिम चरणमा रहेको छ।
Discussion about this post