चलचित्र ‘जदौ’ मा नीति शाह मुख्य भूमिकामा अनुबन्धित

विशेष अनलाइन । नयाँ नेपाली चलचित्र ‘जदौ’ मा नीति शाह मुख्य अभिनेत्रीको रूपमा अनुबन्धित भएकी छिन् । उनी यस चलचित्रमा अभिनेता मुकुन भुसालको जोडीका रूपमा देखिनेछिन्। चलचित्र अन्तर्जातीय प्रेमकथामा आधारित हुने बताइएको छ। चलचित्रमा काम गर्ने विषयमा नीति र निर्माण टिमबीच कागजी सम्झौता भइसकेको छ।

चलचित्रको कथा काजी लिम्बू ले लेखेका हुन्। ‘जदौ’ को निर्माण सिल्भर स्क्रिन इन्टरटेन्मेन्ट र सम्मिश्रण मुभिज एन्ड इन्टरटेन्मेन्ट को संयुक्त ब्यानरमा हुँदैछ। चलचित्रका सह-निर्माताहरू मा रामराजा सुवेदी, ओम चेम्जोङ, शान्ता तामाङ र नारायण शास्त्री रहेका छन्। छायाङ्कन भदौको पहिलो साताबाट सुरु हुने निर्माण पक्षले जानकारी दिएको छ।

चलचित्रको छायाङ्कन दाङ र प्युठानका विभिन्न स्थानमा गरिनेछ । संगीत भने बाबुल गिरीको रहनेछ। सिल्भर स्क्रिन इन्टरटेन्मेन्टकी प्रबन्ध निर्देशक विमला भण्डारीले निर्देशक तथा अन्य कलाकार र प्राविधिकबारे केही दिनभित्र सार्वजनिक गरिने बताएकी छिन् ।