विशेष अनलाइन । नेपाली सिने क्षेत्रमा फरक स्वाद र विषयवस्तु बोकेको फिल्म ‘जनै हराएको मान्छे : सम्बन्धका धागाहरू’ले आफ्नो औपचारिक यात्रा सुरु गरेको छ। सांस्कृतिक परम्परा र मानवीय सम्बन्धको गहिरो भाव बोकेको यस चलचित्रको अफिसियल पोष्टर आइतबार देशभरका आठ प्रमुख सहरहरूमा एकै साथ सार्वजनिक गरियो। कोशी प्रदेशको व्यस्त सहर इटहरीमा भने यो सार्वजनिक कार्यक्रम अझ भव्य र भिन्न शैलीमा सम्पन्न गरियो।
इटहरीको इलाइट सिनेमा हल प्राङ्गणमा विशेष समारोहका साथ फिल्मका तीन भिन्न डिजाइनका पोस्टरहरू सार्वजनिक गरिए। इटहरी उपमहानगरपालिका वडा नं. ६ का वडाध्यक्ष दिवस पोख्रेल, इलाइट सिनेमा हलका म्यानेजर नवराज केसी र परीकला न्यूजका सञ्चालक सुवास संकल्प श्रेष्ठले एक-एक ओटा गरि ३ ओटा पोस्टर सार्वजनिक गरेका थिए ।
देशैभर एकैसाथ विभिन्न स्थानमा छुट्टाछुट्टै कार्यक्रम गतेर पोस्टर सार्वजनिक गरिएको थियो । इटहरीको व्यवस्थापन भने परिकला मिडिया र कोशी पब्लिक मिडिया द्वारा सञ्चालित विशेष अनलाइनलले गरेको थियो ।
पोस्टर सार्वजनिक गर्दै वडाध्यक्ष पोख्रेलले फिल्म यथार्थका धागोहरू बुनिएको कथा भएको उल्लेख गर्दै फिल्म टिमलाई सफलताको शुभकामना व्यक्त गरे। निर्माण पक्षका अनुसार, मोफसलदेखि राजधानीसम्मको दर्शकलाई एकैसाथ जोड्ने उद्देश्यले धरान, विराटनगर, विर्तामोड हुँदै काठमाडौँलगायत आठ सहरमा पोष्टर सार्वजनिक कार्यक्रम आयोजना गरिएको हो।
सम्बन्धका धागोहरूमा बुनिएको कथावस्तु
निर्माता कमल न्यौपानेका अनुसार, फिल्म प्रचारको शैलीलाई परम्परागत ढाँचाबाट अलग राख्दै सहर–सहरमा प्रत्यक्ष सम्पर्क बढाउन यस्ता कार्यक्रम गरिएका हुन्। सार्वजनिक गरिएका पोस्टरहरू फिल्मको कथावस्तु झल्काउने शैलीमा तयार गरिएका छन्।
एउटा पोस्टरमा विजय बराल, केकी अधिकारी र मिरुना मगरलाई एउटै फ्रेममा देखाइएको छ। बीचमा विजय बराल छन्, जसको पोशाक आधा रातो र आधा निलो छ— जुन प्रेम र सामाजिक दायित्वबीचको द्वन्द्वको प्रतीक हो। छेउछाउमा केकी र मिरुना अलग-अलग परिवेशमा देखिएका छन्, जहाँ मिरुना बेहुलीको पोशाकमा सजिएकी छन्। अर्को पोस्टरमा सामाजिक बन्धनको प्रतिनिधित्व गर्ने गरी धागोले बाँधिएको अवस्थामा केकी अधिकारीलाई देखाइएको छ।
पोस्टरमा उल्लेखित संवाद, ‘जति पीडा भए पनि कहिले ऐया नभन्ने मेरी दिदी’ मार्मिक छ— जसले दिदीभाइको सम्बन्ध मात्र होइन, संघर्ष र त्यागको भाव समेत बोकेको अनुभूति गराउँछ।
भदौ ६ मा देशव्यापी प्रदर्शन
फिल्म ‘जनै हराएको मान्छे : सम्बन्धका धागाहरू’ आगामी भदौ ६ गतेबाट देशभर प्रदर्शनमा आउने तयारीमा छ। निर्देशक हिमाल न्यौपानेको निर्देशनमा बनेको फिल्मको कथा, पटकथा र संवाद भानुभक्त ढकालले लेखेका हुन्। विजय बराल, केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, आरुस भुसाल, रियर राई, भावना खपांगी मगर, रुपेश लामा र सुमन थापालगायत कलाकारको अभिनय रहेको छ।
कार्यकारी निर्माता नारायण तिमिल्सिना, चुडामणि सिवाकोटी, आरके मानन्धर रहेका छन्। छायांकन नवीन गुरुङ र कृष्ण परियारले गरेका हुन् भने संगीतमा थानेश्वर गौतम, अर्जुन पोखरेल, एसडी योगी र प्रसान्त सिवाकोटीले विभिन्न राग र भावनाका धुनहरू पस्किएका छन्।
गोविन्द शाहीको काफिया फिल्मसबाट वितरण हुने यो चलचित्र, ‘पूर्णबहादुरको सारंगी’पछि विजय बरालको मुख्य भूमिकामा देखिने अर्को बहुप्रतीक्षित कृति हो। फिल्मले जातीय परम्परा र व्यक्तिगत प्रेमबीचको संघर्ष, सामाजिक परिबन्ध र मानवीय सम्बन्धका गहिरा धागोहरूलाई पर्दामा उतार्ने अपेक्षा गरिएको छ।
Discussion about this post