विशेष अनलाइन । हाल पोस्ट-प्रोडक्सनको अन्तिम चरणमा रहेको बहुप्रतीक्षित नेपाली फिल्म ‘माइतीघर’ ले प्रदर्शनको पूर्वसन्ध्यामा नै अन्तर्राष्ट्रिय बजारमा चर्चा बटुल्न थालेको छ । मिलन तामाङको निर्देशन र रोहित अधिकारीको निर्माणमा तयार भइरहेको यस फिल्मको औपचारिक प्रोमो सामग्री (पोस्टर, टिजर वा ट्रेलर) अहिलेसम्म सार्वजनिक भइसकेको छैन, तर पनि बजारमा यसको प्रतिक्षा चुलिएको देखिन्छ।
आगामी दशैंको फूलपातिको अवसर पारेर विश्वव्यापी रूपमा रिलिज हुने तयारीमा रहेको ‘माइतीघर’ को अस्ट्रेलिया प्रदर्शन अधिकार निकै उच्च मूल्यमा बिक्री भएको छ। अस्ट्रेलियाको हिमारो इन्टरटेन्मेन्टमार्फत प्रमेज धामी र प्रकाश गैरेले यस फिल्मको राइट्स खरिद गरेका हुन्। निर्माण पक्षका अनुसार यस सौदाले फिल्मको लगानीको ठुलो हिस्सा सुरक्षित भइसकेको छ।
अझै पोस्टर सार्वजनिक नभइसकेको अवस्थामा गरिएको यस्तो ठूलो डिलले वितरक र बजार दुबैको फिल्मप्रति गहिरो विश्वास रहेको संकेत गर्छ। निर्माता रोहित अधिकारीका अनुसार, अन्य देशहरूका लागि पनि वितरण अधिकार बिक्री गर्ने प्रक्रिया तीव्र गतिमा अघि बढिरहेको छ।
फिल्मको विषयवस्तु, कलाकारहरूको आकर्षक संयोजन र प्राविधिक पक्षको मेहनतले गर्दा अन्तर्राष्ट्रिय बजारमा यसको माग उल्लेख्य रूपमा बढेको छ। सुसन प्रजापतिको छायांकनमा निर्माण भैरहेको यस फिल्ममा रोहित अधिकारी, रविन शेरचन र धीरज तामाङले लगानी गरेका छन् भने ईश्वर श्रेष्ठ र निरज कटुवाल कार्यकारी निर्माताका रूपमा रहेका छन्।
कलाकारहरूमध्ये केदार घिमिरे, धीरज मगर, प्रकाश सपुत, उपासना सिंह ठकुरी, श्यामश्री शेर्पा, युवराज लामा, बुद्धि तामाङ र शिशिर वाङ्देल प्रमुख भूमिकामा देखिनेछन्।
विदेशी बजारमा यति ठूलो उत्साह सिर्जना गर्न सफल ‘माइतीघर’ अब दशैंमा नेपाली दर्शकसमक्ष आउँदैछ, जसले फिल्मको वास्तविक प्रभाव कस्तो रहनेछ भन्ने कौतुहलता अझै बढाएको छ।
Discussion about this post