विशेष अनलाइन । थारु जातिको मौलिकता, कला, भाषा र चलचित्र क्षेत्रको समुन्नत प्रवर्द्धनका निम्ति एक ऐतिहासिक अवसरका रूपमा सुनसरीको रामधुनी नगरपालिकामा अवस्थित झुम्काले चौथो राष्ट्रिय थारु चलचित्र तथा सांस्कृतिक महोत्सव २०८२ को भव्य तयारी थालेको छ। यही असार ६ र ७ गते आयोजना हुन गइरहेको यो दुई दिने सांस्कृतिक पर्वले थारु समुदायको रङ, गन्ध र गौरवलाई एकैसाथ उजागर गर्ने अपेक्षा गरिएको छ।
महोत्सवको पहिलो दिन झुम्कास्थित ‘कलश पार्टी प्यालेस’मा विभिन्न चलचित्र प्रदर्शनी, समीक्षा, र अन्तर्क्रिया कार्यक्रमहरू सञ्चालन गरिनेछ भने दोस्रो दिन ‘म्याजिक सिनेमा हल’मा थारु चलचित्रहरूको औपचारिक प्रदर्शन तथा समापन कार्यक्रम आयोजना गरिनेछ।
महोत्सवका सन्दर्भमा बुधबार आयोजित पत्रकार सम्मेलनमा थारु चलचित्रका पहिलो नायक तथा थारु चलचित्र तथा सांस्कृतिक संघका केन्द्रीय अध्यक्ष परशुराम चौधरीले भने, “थारु भाषाका चलचित्रहरूको निर्माणमा पछिल्लो समय उल्लेखनीय वृद्धि भए पनि समुचित प्रचारप्रसारको अभाव छ। यस्तो अवस्थामा यो महोत्सव थारु चलचित्र क्षेत्रका लागि कोसेढुङ्गा सावित हुनेछ।”
महोत्सवमा थारु चलचित्रहरू प्रदर्शनसँगै गहिरा अन्तर्क्रियात्मक छलफल, थारु नृत्य प्रतियोगिता, झाँकी प्रदर्शन, वृत्तचित्र प्रदर्शनी, र विशिष्ट व्यक्तित्वहरूलाई सम्मानजस्ता विविध कार्यक्रम समावेश गरिनेछ।
पूर्व मेचीदेखि पश्चिम महाकालीसम्मका थारु कलाकार, चलचित्र निर्माता, निर्देशक, वितरक, सञ्चारकर्मी, साहित्यकार तथा विभिन्न राजनीतिक दलका नेताहरूको गरिमामय सहभागिता रहने जनाइएको छ।
थारु चलचित्र तथा सांस्कृतिक संघ, केन्द्रीय समितिको मुख्य आयोजनामा सम्पन्न हुने यो महोत्सव मोरङ र सुनसरी जिल्ला कार्य समितिहरूको सह–आयोजना तथा नेपाल चलचित्र विकास बोर्डको सहकार्यमा सम्पन्न हुने भएको हो।
थारु आत्मसम्मान, संस्कृतिको सन्देश र चलचित्रको चमक बोक्ने यस महोत्सवले थारु जातीय पहिचानको थप जग बलियो बनाउने विश्वास लिइएको छ।
Discussion about this post