विशेष अनलाइन। अभिनेता सरोज खनाल करिब आठ वर्षपछि मञ्च नाटकमार्फत रंगमञ्चमा पुनरागमन गरेका छन्। थापागाउँस्थित मण्डला थिएटरमा ‘मञ्जिरा’ नाटकको नियमित मञ्चन शनिबारदेखि सुरु भएको छ।
थियटर अभिनयमा फर्कनुको कारण बखान गर्दै खनाल भन्छन्, “फिल्ममा क्यारेक्टरमा डुब्न गाह्रो हुन्छ, थियटरमा भने लामो रिहर्सल र गहिरो संलग्नता हुन्छ। थियटरले चरित्रमा पूर्ण रूपमा समाहित हुन सघाउँछ।”
खनालले यसअघि ८ वर्षअघि मण्डलाकै ‘१२ दुर्वासा’ नाटकमा अभिनय गरेका थिए। ‘मञ्जिरा’ नाटकको विशेष शो शुक्रबार आयोजित गरिएको थियो, जसमा पत्रकार, कलाकार, बौद्धिक क्षेत्रका व्यक्तिहरूको सहभागिता थियो। यो शो विशेषगरी दर्शकहरूको प्रारम्भिक प्रतिक्रिया बुझ्नको लागि गरिएको थियो।
राजनीतिक–सामाजिक विषयमा आधारित नाटक ‘मञ्जिरा’ ले समाजमा व्याप्त अन्याय र नागरिकको मौनताबारे प्रश्न उठाउँछ। नाटकले “अन्याय सहनु पनि आफ्नै विरुद्ध अन्याय गर्नु हो” भन्ने गहिरो सन्देश दिन खोजेको छ।
नाटकमा सरोज खनालसँगै सरिता गिरी, सरस्वती चौधरी, सुशाङ्क मैनाली र अनुप न्यौपाने को पनि अभिनय रहेको छ। नाटकको लेखन सन्देश घिमिरे र सोमनाथ खनाल ले संयुक्त रूपमा गरेका हुन् भने निर्देशन सोमनाथ खनाल कै हो।
‘मञ्जिरा’ असार ८ गतेसम्म सोमबारबाहेक हरेक दिन मण्डला थिएटरमा मञ्चन हुँदैछ। मञ्चन समय बेलुकी ५:१५ बजे, शनिबार भने दिउँसो १ बजे र बेलुकी ५:१५ बजे तोकिएको छ।
Discussion about this post