जेठ १५ मा आउने भनिएको ‘महाभोज’ स्थगित

विशेष अनलाइन।  नेपाली चलचित्र ‘महाभोज’ अब जेठ १५ गते प्रदर्शन नहुने भएको छ । देशभर भइरहेका आन्दोलन र असहज परिस्थितिका कारण फिल्म हाललाई रोकिएको छ।

चलचित्रका निर्माता हिमाल कडरियाले बुधबार प्रेस विज्ञप्ति निकालेर यो जानकारी दिएका हुन्। विज्ञप्तिमा उल्लेख छ, “विभिन्न आन्दोलन र पछिल्लो समयको विषम अवस्थाले जनजीवन प्रभावित भएकोले चलचित्र हाललाई नेपाल र विदेश दुवैतर्फ प्रदर्शन नगरिने निर्णय गरिएको छ।”

निर्माताले दर्शकको उत्साहप्रति आभार व्यक्त गर्दै, उनीहरूको सुरक्षालाई पहिलो प्राथमिकतामा राखिएको बताएका छन्। अवस्था सामान्य भएपछि पहिलो सम्भव मितिमा फिल्मको नयाँ प्रदर्शन मिति घोषणा गरिने जनाइएको छ।

सहकारीको रकम दुरुपयोगको कथामा बनेको ‘महाभोज’ लामो समयदेखि प्रचारमा थियो। अब दर्शकहरूलाई केही समय पर्खनु पर्ने भएको छ। चलचित्र टिमले दर्शक, वितरक, सञ्चारकर्मी र शुभचिन्तकहरूसँग निरन्तर साथ र समझदारीको अपेक्षा राखेको छ।