विशेष अनलाइन । नेपालको सिनेमा जगतलाई नयाँ सिरेबाट हलचलमा ल्याउने तयारीमा छ चलचित्र ‘ऊनको स्वीटर’ । यो शुक्रवार (वैशाख २६) बाट देशभर प्रदर्शनमा आउन लागेको यो चलचित्रको अग्रिम टिकट बुकिङले नै दर्शकहरूको उत्साह मापन गरिसकेको छ।
क्युएफएक्स, बिग मुभिज, आइएनआई, एफक्युब लगायतका काठमाडौं उपत्यकाका ठूला सिनेमा हलहरूदेखि उपत्यका बाहिरका साना हलसम्म, ‘ऊनको स्वीटर’को टिकट बुकिङ खुलेसँगै दर्शकहरूको प्रतिक्षा झन् चुलिएको छ। वितरक गोविन्द शाहीका अनुसार, हालसम्म तीन सयभन्दा बढी शोको अनुमान गरिएको छ, तर अन्तिम सङ्ख्या बिहीबार मात्र सार्वजनिक हुनेछ।
आर्टमाण्डू प्रा.लि.को ब्यानरमा निर्माण भएको यो चलचित्रमा विपिन कार्की, मिरुना मगर, परीक्षा लिम्बु, एलेक्स पारस, र विल्सन विक्रम राई मुख्य भूमिकामा छन्। सुनिल पोखरेल, माओत्से गुरुङ, प्रेम सुब्बा, सुरज तमु, शारदा देवी सिलवाल, र भावना खपाङ्गी मगरजस्ता अनुभवी कलाकारहरूको समेत दमदार उपस्थिति रहेको छ।
सङ्गीततर्फ सुजन चापागाईँ र झुमा लिम्बुको संगीतमा बनेका गीत ‘फूल’, ‘मखमली’, र ‘काफ्ले’ दर्शकमाझ लोकप्रिय भइरहेका छन्। सामाजिक सञ्जालमा भाइरल भएको ट्रेलरले दर्शकहरूको कौतुहलता झनै बढाएको छ।
निर्देशक नवीन चौहानको पहिलो फिचर चलचित्र ‘ऊनको स्वीटर’को कथा पाँचथरदेखि भारतको वेस्ट बङ्गालसम्म फैलिएको छ। चौहान, जसले यसअघि ‘घुमी घुमी’, ‘देखेर तिमीलाई – तीनपाते’, ‘फूलथुङ्गे रानी’, ‘चन्द्रमा’ जस्ता चर्चित सङ्गीतमूलक चलचित्र निर्देशन गरिसकेका छन्, अब कथा प्रधान फिचर चलचित्रमार्फत आफ्नो निर्देशन यात्रा अघि बढाउँदैछन्।
टिकट बुकिङ खुल्नासाथै देखिएको दर्शकहरूको उत्साह र व्यापक शोको व्यवस्थापनले यो चलचित्रले राम्रो सुरुवात गर्ने सङ्केत देखाएको छ। अब, शुक्रबारको प्रतिक्षा छ – कुन उचाइमा पुग्छ ‘ऊनको स्वीटर’? समयले बताउनेछ।
Discussion about this post