विशेष अनलाइन । प्रेम कथामा आधारित नयाँ नेपाली चलचित्र ‘सुम्निमा’ ले अन्तर्राष्ट्रिय स्तरमा दर्शकलाई प्रेमको कथा सुनाउन तयारी गरेको छ। निर्देशक मिलन चाम्सको यो ११ औं निर्देशनले नेपाली र अंग्रेजी भाषामा एकैसाथ निर्माण हुँदैछ, जसले नेपाल र बेलायतलाई छायांकन स्थलका रूपमा चयन गरेको छ।
चलचित्रको मुख्य भूमिकामा अभिनेत्री उपासना सिंह ठकुरी अनुबन्धित भइसकेकी छन्। उनको जोडी बन्ने अभिनेता भने अडिसनमार्फत छनोट हुनेछ। निर्माण टिमले २० देखि २६ वर्ष उमेर समूहका, बेलायतमा बसोबास गर्ने युवाहरूलाई अडिसनमा सहभागी हुन आमन्त्रण गरेको छ। प्रतिभाशाली अनुहारलाई उपासनासँग रोमान्टिक जोडीको रूपमा पर्दामा प्रस्तुत गर्ने योजना रहेको बताइएको छ।
‘सुम्निमा’ चाम्स इन्टरटेनमेन्ट र गोर्खा फिल्म्सको संयुक्त ब्यानरमा निर्माण हुने यो फिल्मको कथा र पटकथा राजीव थापाले लेखेका हुन्। निर्देशक चाम्सले चलचित्रलाई ‘युनिभर्सल’ विषयवस्तुमा आधारित रहेको बताउँदै यसलाई अन्तर्राष्ट्रिय स्तरमा पुर्याउने लक्ष्य राखेका छन्।
उनको पछिल्लो बायोपिक चलचित्र ‘अञ्जिला’ले ५१ दिनको सफल यात्रा पूरा गरेपछि ‘सुम्निमा’प्रति उनले अझ उच्च अपेक्षा राखेका छन्। चलचित्रको छायांकन सन् २०२५ को जुलाई महिनाबाट नेपाल र बेलायतमा एकसाथ सुरु हुनेछ।
निर्माण पक्षले अन्य कलाकार र प्राविधिक टिमको जानकारी चाँडै सार्वजनिक गर्ने तयारी गरिरहेको छ।
Discussion about this post