नेपाली स्क्रिनमा ‘अञ्जिला’को गोल: ५१ दिन, १० करोड र एक प्रेरणादायी यात्राको सेलिब्रेशन

विशेष अनलाइन । नेपाली चलचित्र इतिहासमा ‘बायोपिक’ विधामा अब एक नयाँ कीर्तिमान थपिएको छ। मिलन चाम्स निर्देशित चलचित्र ‘अञ्जिला’ले प्रदर्शनको ५१ औँ दिनमा प्रवेश गर्दै नेपाली महिलाको कथामा आधारित चलचित्रहरूले पनि दर्शकको मन जित्न सक्ने कुरा प्रमाणित गरिदिएको छ।

गत वर्षको फागुन २९ गतेदेखि पर्दामा उत्रिएको यो चलचित्रले अहिलेसम्म १० करोड रुपैयाँभन्दा बढीको व्यापार गरिसकेको छ। निर्देशक चाम्स भन्छन्, “५१ दिनसम्म हलमा टिक्न सक्ने सम्भवत: यो पहिलो नेपाली बायोपिक चलचित्र हो। त्यो पनि महिला फुटबल कप्तानको कथा – जुन आफैँमा गर्वको विषय हो।”

फुटबल मैदानबाट सिनेमाघरसम्मको यात्रा
‘अञ्जिला’ कुनै काल्पनिक कथामा आधारित चलचित्र होइन। यो हो – नेपाली महिला राष्ट्रिय फुटबल टोलीकी कप्तान एन्जिला तुम्बापो सुब्बाको जीवन यात्रा। एउटा सानो गाउँबाट उठेकी एउटी चेली कसरी राष्ट्रिय पहिचान बन्न पुग्छिन्, त्यो देखिन्छ पर्दामा। फुटबलको मैदानमा उनले गरेको संघर्ष, समाजका सवालसँगको जुझारूपन र व्यक्तिगत जीवनका उतारचढावहरू चलचित्रको मेरुदण्ड बनेका छन्।

कलाकारहरूको गोलमाल हैन, गोलकिक जस्तो अभिनय
चलचित्रमा एन्जिलासँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारहरूको अभिनयले कथालाई बलियो बनाएको छ। खासगरी दयाहाङ राई र बुद्धि तामाङको भूमिकाले भावनात्मक गहिराइ थपेको बताइन्छ।

५१ दिनको विजय उत्सव
चलचित्रले ५१ दिन पार गरेपछि निर्माण युनिटले यो अवसरलाई सेलिब्रेट समेत गरेको छ। शुक्रबार काठमाडौंमा विशेष कार्यक्रमको आयोजना समेत गर्यो, जहाँ कलाकार, निर्देशक, निर्माता, तथा विभिन्न क्षेत्रका पाहुनाहरूको उपस्थिति थियो ।

महिला केन्द्रित चलचित्रको उचाइ
नेपाली चलचित्र उद्योगमा कमै मात्र महिला पात्रहरूको जीवनमा केन्द्रित सिनेमाहरू बनाइएका छन्। अझ बढी, फुटबल जस्तो खेलमा आधारित महिला बायोपिक पहिलो हो भन्न सकिन्छ। ‘अञ्जिला’ ले यो अभाव मात्र हटाएको छैन, भविष्यमा महिला कथाहरूले पनि व्यावसायिक सफलता पाउन सक्छन् भन्ने आत्मविश्वास पनि बढाएको छ।

अन्ततः…
चलचित्र ‘अञ्जिला’ कुनै ठूलो सुपरस्टारको भरमा होइन, एक सच्चा पात्रको आत्मबलमा चलेको चलचित्र हो। यो केवल मनोरञ्जन होइन, प्रेरणाको कथा हो – विशेषगरी ती युवतीहरूका लागि, जसले सपना देख्छन् तर परिवारकै सदस्य अनि समाजले बारम्बार तगारो लगाइरहन्छ।