विशेष अनलाइन । स्कटल्याण्डको राजधानी एडिनबर्गमा ‘आदिवासी जनजाति चलचित्र महोत्सव २०२५’ आयोजना हुने भएको छ।
कार्यक्रम आगामी १९ जुलाई २०२५ (२०८२ साउन ३ गते) हुने छ ।
२०२५ फेब्रुअरी १० मा काठमाडौंमा आयोजित एक औपचारिक कार्यक्रममा नेपाल स्कटल्याण्ड एसोसिएसन (NSA) का अध्यक्ष तथा महोत्सव संयोजक विजय डंगोल, हिमालय सेन्टर एडिनबर्गका अध्यक्ष टीका लिम्बु, रंगकर्मी तथा कलाकार सुबास थापा, निर्माता सागर सुवेदी र नेपाल चलचित्र निर्देशक समाजका महासचिव तथा नेपाल चलचित्रकर्मी महासंघ, कोशी प्रदेशका अध्यक्ष एवं महोत्सव निर्देशक अरुण कुमार प्रधानले संयुक्त रूपमा महोत्सवको ब्यानर सार्वजनिक गर्दै औपचारिक घोषणा गरेका थिए।
आयोजक र सहकार्य
स्कटल्याण्डतर्फ महोत्सवको आयोजना नेपाल स्कटल्याण्ड एसोसिएसन (NSA) ले गर्नेछ भने नेपालतर्फ चलचित्रकर्मी महासंघ, कोशी प्रदेश र नेपाल चलचित्र निर्देशक समाजले संयुक्त रूपमा सहकार्य गर्नेछन्। साथै नेपाल आदिवासी जनजाति महासंघ बेलायत, फिल्म कल्चर सोसाइटी अफ नेपाल, आदिवासी जनजाति चलचित्र महासंघ केन्द्रीय समिति तथा प्रदेश १ समितिले सहयोगी संस्थाका रूपमा साथ दिनेछन्।
चलचित्र सहभागिताको मिति र प्रक्रिया
चलचित्र आह्वान मिति : २०८२ बैशाख १२ गते (२५ अप्रिल २०२५)
फर्म बुझाउने अन्तिम मिति : २०८२ जेठ १५ गते (२९ मे २०२५)
महोत्सवमा आदिवासी जनजाति विषयमा आधारित छोटा चलचित्र, वृत्तचित्र तथा विभिन्न भाषाभाषी समुदायलाई प्रतिनिधित्व गर्ने चलचित्रहरू सहभागिता गराइनेछ। साथै आदिवासी कथामा आधारित मुख्यधाराका कथानक चलचित्रहरूलाई पनि विशेष अवार्ड तथा सम्मान प्रदान गरिनेछ।
प्री-इभेन्ट कार्यक्रम काठमाडौंमा
महोत्सवको प्री-इभेन्ट कार्यक्रम आगामी २०८२ जेठ २४ गते (७ जुन २०२५) मा काठमाडौंमा आयोजना गरिनेछ।
यस कार्यक्रममा महोत्सवमा सहभागी सम्पूर्ण चलचित्र, छोटा चलचित्र र वृत्तचित्रलाई सहभागिताको प्रमाणपत्र प्रदान गरिनेछ। कार्यक्रममा नेपाल सरकारका माननीय मन्त्रीहरू, चलचित्र विकास बोर्डका अध्यक्ष तथा पूर्व अध्यक्षहरू र विशिष्ट चलचित्रकर्मीहरूको विशेष उपस्थिति रहनेछ।
फाइनल इभेन्ट स्कटल्याण्डमा
महोत्सवको फाइनल इभेन्ट तथा अवार्ड वितरण समारोह २०८२ साउन ३ गते (१९ जुलाई २०२५) स्कटल्याण्डको एडिनबर्गमा भव्य रूपमा आयोजना गरिनेछ।
‘हाम्रो खाना, हाम्रो पहिरन, हाम्रो संस्कृति, हाम्रो चलचित्र’ भन्ने नारासहित आयोजना हुने महोत्सवमा जातीय खाना उत्सव, जातीय पहिरन प्रदर्शनी, चलचित्र प्रदर्शनी, अन्तरक्रिया कार्यक्रम, सम्मान समारोह, सांस्कृतिक कार्यक्रम तथा अवार्ड वितरण कार्यक्रम गरिनेछ। कार्यक्रममा सहभागी सबै दर्शक तथा अतिथिहरूले अनिवार्य रूपमा नेपाली मौलिक परम्परागत पहिरनमा उपस्थित हुनुपर्नेछ।
नेपाल स्कटल्याण्ड एसोसिएसनका अध्यक्ष विजय डंगोलले पहिलो पटक एडिनबर्गमा आयोजना हुन लागेको महोत्सवले आदिवासी जनजाति चलचित्र क्षेत्रको प्रवर्द्धनमा ऐतिहासिक भूमिका खेल्ने विश्वास व्यक्त गरेका छन्।
Discussion about this post