चलचित्र ‘अञ्जिला’ चौथो हप्तामा शानदार प्रदर्शन, बलिउडको ‘सिकन्दर’लाई चुनौती

विशेष अनलाइन । नेपाली चलचित्र ‘अञ्जिला’ प्रदर्शनको चौथो हप्तासम्म आइपुग्दा पनि दर्शकको मन जित्न सफल भइरहेको छ। फागुन २९ गतेदेखि प्रदर्शनमा आएको यो चलचित्रले सुरुदेखि नै राम्रो चर्चा कमाएको थियो, र अहिले झन् लोकप्रिय बन्दै गएको छ। दर्शकको सकारात्मक प्रतिक्रिया र उच्च मागका कारण देशभरका हलहरूमा शो संख्या पनि बढाइएको छ।

रिलिजको पहिलो दिनको तुलनामा अहिले ‘अञ्जिला’ले दोब्बरभन्दा बढी शो पाएको छ, जुन नेपाली चलचित्रका लागि दुर्लभ उपलब्धि हो। अझ रोचक कुरा के छ भने, यसले बलिउड सुपरस्टार सलमान खानको ‘सिकन्दर’लाई समेत पछि पारेको छ। ‘सिकन्दर’ले कमजोर प्रतिक्रिया पाएपछि ‘अञ्जिला’लाई अझ राम्रो अवसर मिलेको देखिन्छ।

हाल शो संख्याको हिसाबले ‘सिकन्दर’ अगाडि देखिए पनि टिकट बुकिङमा भने ‘अञ्जिला’ अगाडि रहेको छ। अग्रिम टिकट बुकिङ र दर्शकको उत्साह हेर्दा यो चलचित्रको प्रभाव अझै मजबुत रहेको स्पष्ट हुन्छ।

नेपाली महिला राष्ट्रिय फुटबल टोलीकी कप्तान एन्जिला तुम्बापो सुब्बाको जीवनमा आधारित यस चलचित्रमा उनी आफैं मुख्य भूमिकामा छिन्। उनको अभिनयले दर्शकलाई भावुक मात्र होइन, प्रेरित पनि बनाइरहेको छ। साथै, दयाहाङ राई, सिर्जना सुब्बा, प्रेमकुमार श्रेष्ठ, सुनील थापा, विजय बराल, माओत्से गुरुङ, सुमीन गुरुङ र बुद्धि तामाङको दमदार अभिनयले चलचित्रलाई थप प्रभावशाली बनाएको छ।

खेलकुद र संघर्षको कथाले भरिएको ‘अञ्जिला’ नेपाली चलचित्र उद्योगका लागि एउटा नयाँ माइलस्टोन बनेको छ। मनोरञ्जन मात्र होइन, प्रेरणादायी सन्देश पनि दिन सफल यस चलचित्रलाई दर्शकले अझै धेरै माया गरिरहेका छन्।