विशेष अनलाइन । फ्युचर रियल स्टेट एण्ड हाउजिङ प्रा.लि.ले नेपाल चलचित्रकर्मी महासंघ कोसी प्रदेशलाई एक कठ्ठा जग्गा सहित चार कोठे भवन प्रदान गर्ने भएको छ । मोरङको सुन्दरहरैचा नगरपालिका वडा २ मा बन्न लागेको फ्युचर कोलोनीमा जग्गा सहित चार कोठे भवन महासंघलाई निशुल्क प्रदान गर्ने सम्झौता भएको हो ।
फ्युचर रियल स्टेट एण्ड हाउजिङ प्रा.लि.इटहरी सुनसरीका तर्फबाट प्रा.लि.सञ्चालक सुन्दरहरैचा २ बस्ने यम बहादुर लामा र नेपाल चलचित्रकर्मी महासंघ कोसी प्रदेशको तर्फबाट अध्यक्ष अरुण कुमार प्रधानले हस्ताक्षर गरेका हुन् ।
सम्झौता अनुसार सुन्दरहरैचा २ मा बन्दै गरेको फ्यूचर कोलोनी भित्रबाट दक्षिण गेट तर्फबाट एक कठ्ठा जमिनमा ४ कोठे पक्की घर समेत निर्माण गरी चलचित्रकर्मी महासंघलाई २०८४ साल भित्र हस्तान्तरण गरिने उल्लेख गरिएको छ । चलचित्रकर्मी महासंघ भित्र रहेका इच्छुक व्यक्तिहरूले फ्युचर कोलोनीमा व्यक्तिगत रूपमा लगानी गरी फाइदा लिन सकिने समेत सम्झौतामा उल्लेख गरिएको छ ।
उक्त स्थानमा चलचित्रकर्मी महासंघको भवन निर्माण हुँदा कोलोनीको जमिनको मूल्य वृद्धि हुने कुरालाई मध्यनजर गर्दै प्रथम पक्षले बिना स्वार्थ जमिन तथा भवन उपलब्ध गराएकाले दोस्रो पक्षले पनि सोही अनुसार प्रथम पक्षलाई आवश्यक सहयोग गर्नुपर्ने सम्झौतामा उल्लेख गरिएको छ ।
सम्झौता हस्ताक्षर कार्यक्रममा बोल्दै चलचित्रकर्मी महासंघ कोसी प्रदेशका अध्यक्ष अरुण कुमार प्रधानले यो महान् कार्यका लागि फ्युचर रियल स्टेट एण्ड हाउजिङ प्रा.लि.लाई धन्यवाद दिए । उनले महासंघ सधैँ उक्त संस्थासँग सहकार्य गरेर अघि बढ्ने बताए । यता फ्युचर रियल स्टेट एण्ड हाउजिङ प्रा.लि. सञ्चालक यम बहादुर लामाले चलचित्र क्षेत्रमा आफ्नो पनि झुकाव रहेको उल्लेख गर्दै सहकार्य गरेर अघि बढ्ने अवसर प्राप्त भएकोमा खुसी व्यक्त गरे ।
अध्यक्ष प्रधानले बन्न लागेको महासंघको भवनमा चलचित्र पत्रकार संघका लागि पनि स्थान छुट्याइने बताए ।
नेपाल चलचित्र संघ पूर्वाञ्चल शाखाका अध्यक्ष एवम् म्याजिक सिनेमा हल सञ्चालक परशुराम चौधरी, नेपाल चलचित्र कलाकार संघ कोसी प्रदेश अध्यक्ष पुष्प श्रेष्ठ, नेपाल चलचित्रकर्मी महासंघ कोसी प्रदेश वरिष्ठ उपाध्यक्ष रेणु चौधरी, महासचिव दिनेश कोइराला,अनाम नाट्य समूह धरानका अध्यक्ष विजय साम्योक सुब्बा,निर्माता तथा कलाकार सागर सिङ्गल,निर्देशक समाज कोसी प्रदेश सचिव विनोद पुडासैनी, चलचित्र पत्रकार संघ सुनसरी सचिव सुमन भट्टराई लगायतले बोल्दै फ्युचर रियल स्टेट एण्ड हाउजिङ प्रा.लि.लाई धन्यवाद ज्ञापन गरे ।
Discussion about this post