विशेष अनलाइन । यस वर्षको अपेक्षित चलचित्र ‘बेहुली फ्रम मेघौली’को एडभान्स बुकिङ सोमबारदेखि खुल्ला भएको छ । असोज १७ गते घटस्थापनाको अवसर पारेर रिलिजको तयारीमा रहेको चलचित्रको इटहरीको इलाइट सिनेमा सहित देशैभरका चलचित्र हलहरुले एडभान्स बुकिङ खुल्ला गरेका हुन् ।
चलचित्रलाई प्रमुख मल्टिप्लेक्स चेन क्यूएफएक्सले देशभर ७३ शो उपलब्ध गराएको छ, जसमा ३२ शो काठमाडौं उपत्यकामा र ४१ शो मोफसलमा खुला गरिएको छ।
यसका साथै, आइएनआई सिनेमाजले काठमाडौंका दुई हल र बुटवलमा गरि १४ शो दिएका छन् भने वान सिनेमाजले नयाँ बानेश्वर र कालीमाटीका हलहरुमा ९ शो उपलब्ध गराएको छ। बिग मुभिजले ६ शो र एफक्युबले ७ शो दिएका छन्। अझै केही हलमा एडभान्स बुकिङ खुल्न बाँकी रहेकोले पहिलो दिन चलचित्रले दुई सय भन्दा बढी शो पाउने सम्भावना रहेको छ।
नेपाली चलचित्रमा लागेको खडेरीलाई केही हदसम्म यस अघिको चलचित्र ‘खुस्मा’ले कम गरेको उल्लेख गर्दै इटहरीको इलाइट सिनेमाका प्रमुख नवराज केसीले ‘बेहुली फ्रम मेघौली’लाई दर्शकले पर्खिरहेको बताए । ‘खुस्मा’ले दर्शकको खडेरी केही हदसम्म कम गर्यो । ‘बेहुली फ्रम मेघौली’ सहित अब प्रदर्शनमा आउने चलचित्रहरुले सिनेमा घरमा दर्शकको भिड लाग्नेमा आसावादी छौँ, केसीले भने ।
‘बेहुली फ्रम मेघौली’लाई साजन काफ्ले र आकाश बरालले संयुक्त रुपमा निर्देशन गरेका हुन्। चलचित्रमा स्वस्तिमा खड्का र निश्चल बस्नेतको मुख्य भूमिका रहेको छ भने बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारी लगायतका कलाकारहरुको अभिनय छ। चलचित्रले उमेर पुगेकी युवतीमाथि समाज र परिवारले विवाहका लागि दिने दबाब र त्यसबाट उत्पन्न हुने परिस्थितिको कथा प्रस्तुत गर्नेछ।
चलचित्रमा जयन जे वाइवा र कुशल पोखरेलको संगीत, प्रदीप लामा र केबीका खत्रीको कोरियोग्राफी रहेको छ । स्वस्तिमा खड्काले निर्माण गरेको चलचित्रको छायांकन नरेन्द्र मैनालीले गरेका छन् भने सम्पादन निमेष श्रेष्ठले गरेका हुन्।
Discussion about this post