विशेष अनलाइन । अशोक थापाको लेखन तथा निर्देशन रहेको चलचित्र ‘खुस्मा’को प्रिमियर गरिएको छ । मंगलबार साँझ कमलपोखरीस्थित बिग मूभिजमा आयोजित प्रिमियरमा राजनीतिज्ञ, चलचित्रकर्मी र रङ्ग पत्रकारको उपस्थिति रहेको थियो ।
चलचित्र हेर्न सांसद ज्ञानेन्द्र शाही, निर्देशक निश्चल बस्नेत, रामबाबु गुरुङ, घनश्याम लामिछाने, कोरियोग्राफर तथा निर्देशक रेनेशा वान्तवा राई, लेखक प्रदीप भारद्धाज, निर्माता रोहित अधिकारी, सरोज न्यौपाने, अभिनेताद्धय सलिनमान बनियाँ र आर्सीवाद क्षेत्री, अभिनेत्री गौमाया गुरुङ, पशुपति राई, लुनिभा तुलाधर तथा रुकुमका स्थानिय बासिन्दाको समय उपस्थिति थियो ।
चलचित्र हेरिसकेपछि सांसद ज्ञानेन्द्र शाहीले भन्छन् , ‘एक पटक तपाईंले यो चलचित्र हेर्नुभएन भने तपाईंले २०५२ सालपछिको नेपाल नै बुझ्नु हुन्न । एक जना सामान्य मान्छेको जीवनमा राज्य र विद्रोही पक्षबाट के कति असर पर्यो भन्ने कुरा स्पष्ट रुपमा देखाउनु भएको छ । ’
प्रिमिएरमा अधिकांशले चलचित्रको कथाले मन छोएको बताए । कतिपयले अभिनेता धिरज मगर र अभिनेत्री उपासना सिंह ठकुरीको अभिनयको तारिफ गरेका छन् । चलचित्रको कथाबस्तुले आफूलाई रिलेटेट गरेको समेत दर्शकहरुले बताए । दर्शकले माओवादी द्वन्द्वको असर भोग्नेले यो चलचित्रको कथावस्तुलाई महसुस गर्ने प्रतिक्रिया दिए ।
प्रिमियरमा प्राप्त प्रतिक्रियाबाट उत्साहित देखिएका धीरज ‘खुस्मा’लाई आम नेपालीको कथा भन्न रुचाउँछन् । उनी भन्छन्, ‘यो सबै नेपालीले भोगेको र देखेको कथा हो । उपासनाले निभाएको चरित्र धेरै महिलाको कथा हो । हामीले छायांकन रुकुममा गर्यौं तर यो कथा आम नेपालीको हो ।’ उपासनाले पनि धीरजको कुरामा सहमति जनाइन् ।
चलचित्रमा धिरज र उपासनाका अलवा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, सङ्गीता थापा मगर, अरुन मगर, सारा राई, श्वेता मिश्र, विवेश मगर लगायतका कलाकारहरुको अभिनय रहेको छ ।
चलचित्रको निर्माता वीर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर रहेका छन् । चलचित्रको सह–निर्माता सुस्मिता बुढाथोकी हुन् । मगर समुदायको परिवेशमा निर्माण भएको प्रेमकथामा आधारित चलचित्रले जनयुद्धको प्रभावका बिच अंकुराएको प्रेमलाई पर्दामा देखाउने छ । एसडी योगी र छान्जु पार्क (कोरियन)को सङ्गीत रहेको चलचित्रको वितरण गोविन्द शाहीको काफिया फिल्मसले गरेको हो ।
Discussion about this post