बलिउड स्टार नवाजुद्दिन र अनुरागको उपस्थितिमा काठमाडौंमा गरियो ‘शाम्बाला’को प्रिमियर

विशेष अनलाइन। मीनबहादुर भामले निर्देशन गरेको चलचित्र ‘शाम्बाला’को काठमाडौंमा भव्य प्रिमियर गरिएको छ । क्यूएफएक्सको छायाँ मल्टिप्लेक्समा आयोजित समारोहमा बलिउड स्टारहरु नवाजुद्दिन सिद्दिकी र अनुराग कश्यपको उपस्थितिमा प्रिमियर सम्पन्न गरिएको छ ।

‘शाम्बाला’को प्रिमियरमा निर्देशक भाम, कलाकार थिन्ले ल्हामो, सोनम तोप्दनेसहित कास्ट एण्ड क्रू , सेलेव्रिटी स्टार, नेपालि कलाकाहरु तथा अन्य अतिथिको बाक्लो उपस्थिती रहेको थियो ।

प्रिमियर समारोहअघि संक्षिप्त मन्तव्य दिँदै भारतीय निर्देशक कश्यप र अभिनेता सिद्दिकीले नेपाली चलचित्रको विकासक्रमको प्रशंसा गरेका छन् । सिद्दिकीले मीन भामजस्ता उदीयमान निर्देशकले गर्दा नेपाली चलचित्रको भविष्य उज्वल रहेको बताए ।

चलचित्र हेरिसकेपछि सिद्दिकी र कश्यपले चलचित्रको प्रशंसा गरेका छन् । उनीहरुले निर्देशकीय पक्षको तारिफ गर्दै यसले नेपाली चलचित्रको विकासमा टेवा पुग्ने बताए । ‘शाम्बाला’ आगामी शुक्रबार देशब्यापी रिलिज तयारीमा रहेको छ । सोमबार मात्रै सिद्दिकी र कश्यप गोसाइकुण्ड र लाङटाङ भ्रमणमा जाने योजना रहेको छ ।