विशेष अनलाइन । बिराज भट्टको निर्माण तथा निर्देशनमा बनेको चलचित्र ‘१२ गाउँ’ को पहिलो गीत ‘सिनेमा हेर्न जाऊँ’ सार्वजनिक गरिएको छ । रोमान्टिक शैलीको गीतमा अभिनेता तथा विराजका छोरा समीर भट्ट र अभिनेत्री सोनु चन्द्रपालको अभिनय रहेको छ ।
गुजराती तथा दक्षिण भारतीय चलचित्र र टेलिभिजन सिरियलकी चर्चित अभिनेत्री सोनु चन्द्रपालले चलचित्र ‘१२ गाउँ’ बाट नेपाली चलचित्रमा डेब्यु गरेकी हुन् । गीतको कोरियोग्राफी सुनिल क्षेत्रीले गरेका हुन् । सार्वजनिक गीतमा अर्जुन पोखरेलको शब्द, सङ्गीत र बलिउड गायक नकाश अजिजको स्वर रहेको छ । चलचित्रको यसअघि सार्वजनिक पोस्टर र एक्सन टिजरले दर्शकमाझ प्रचार उच्च बनाइसकेको छ ।
पूर्वमिस नेपाल इन्टरनेशनल न्यान्सी खड्का र मोडल सनिशा भट्टराई यस चलचित्रबाट अभिनेत्रीको रूपमा डेब्यु गर्दैछन् । चलचित्रमा बिराज, समीर, न्यान्सी र सनिशाका अलवा मुरलीधर, कनिज कोइराला, नरेन खड्का, दिया मास्के, कृष्ण भट्ट, सोनु चन्द्रपाल, कालु राना, अर्जुन जंग शाही, भिष्म जोशी, शुलेमान शंकर (इकु), तारा शर्मा, किशोर भट्ट, सन्तोष सरकार र स्टन्ट शिल्भाको अभिनय रहने छ ।
बिराज भट्ट फिल्म पोडक्सनको प्रस्तुतिमा निर्माण भएको चलचित्रमा अर्जुन पोखरेल र नीरजको सङ्गीत, रामजी लामिछाने, सुनिल क्षेत्री र कविराज गहतराजको कोरियोग्राफी तथा प्रवीण केएल र भुपेन्द्र अधिकारीको सम्पादन छ । चलचित्रमा बिराज स्वंयमको कथा र सन्तोष सरकारको पटकथा तथा संवाद छ ।
एक्सन–थ्रिलर कथामा बन्न लागेको चलचित्रका लागि विराजले भारतबाट द्वन्द्व निर्देशक ल्याएका छन् । तमिल तथा कन्नड चलचित्रका द्वन्द्व निर्देशक भएर काम गरेका स्टन्ट सिल्भालाई द्वन्द्व निर्देशनमा शंकर महर्जनले सघाएका छन् । महेश पौडेल छायाङ्कन रहेको चलचित्रको काठमाडौँ, ललितपुर, वीरगन्ज र हेटौँडामा छायाङ्कन गरिएको हो । चलचित्रको वितरण काफिया फिल्मस् र कुवेर सिने डिष्ट्रिव्युसनले गर्नेछ ।
Discussion about this post