विशेष अनलाइन । वसन्त निरौलाले निर्देशन गरेको चलचित्र ‘ज्वाइँ साब’को टिजर सार्वजनिक भएको छ । जितु नेपाल र नीति शाहको मुख्य भूमिका रहेको चलचित्रको टिजरमा विवाह गर्न खोजिरहेका पात्र र तिनको रमाइला घटनाहरुलाइ देखाइएको छ ।
चलचित्रको टिजरमा जितुलाई गोवर्द्धन पण्डितको भूमिकामा चिनाइएको छ । टिजरमा नीतिको पात्रसँग गोवर्द्धन पात्रको विवाह भएको देखाइएको छ ।नीतिलाई बेहुली बनेर हात्तीमा चढेको देखिएको छ । बुद्धि तामाङ र पन्त पनि फिचर्ड छन् । यी दुईको पात्र पनि विवाहकै मनोदशामा रहेको बुझ्न सकिन्छ ।
चलचित्रमा जितु , नीति , बुद्धि ,हिमेश सहित रमेश बुढाथोकी, शिशिर बाङ्देल, प्रकाश घिमिरे, नीमा पाण्डे, शिवहरी वैरागी, राजेन्द्र नेपाली, कविता आले, शिवु पाण्डे, इशान राउत लगायत कलाकरहरुको अभिनय रहेको छ ।
चलचित्रमा मीनादेवी खड्का, सौगात पण्डित र पदमलाल तामाङले लगानी गरेका हुन् । विजय बस्याल कार्यकारी निर्माता रहेको चलचित्रमा शंकर धितालको लेखन, सविन अधिकारीको कथा रहेको छ । चलचित्रमा श्याम तामाङको छायांकन ,सञ्जय थापाको एक्सन, अर्जुन पोखरेल र महेश ताम्राकारको संगीत छ ।
राजकुमार पण्डितको प्रस्तुतिमा तयार भएको चलचित्र ‘ज्वाइँ साब’ असोज २४ गते दशैंको फूलपातीमा रिलिज हुँदैछ । यो चलचित्र उक्त मितिमा ‘छक्कापञ्जा ५’ र ‘१२ गाउँ’सँग भिड्दैछ ।
Discussion about this post