विशेष अनलाइन । जौन योन्जन निर्देशित चलचित्र ‘आँखा’को प्रदर्शन मिति तय भएको छ। सामाजिक विषयवस्तुमा बनेको चलचित्र आगामी असोज ११ गतेबाट प्रदर्शनमा आउने भएको हो । चलचित्रको एक नयाँ पोस्टर सार्वजनिक गर्दै निर्माण कम्पनी लामा सिनेमाजले प्रदर्शन मिति तय गरिएको जानकारी दिएको छ ।
सुकुम्वासी बस्ती र सूर्यमुखी फूललाई पृष्ठभूमि यो चलचित्र तयार गरिएको हो । पोस्टरमा अभिनेत्री स्मिता लामिछाने र अभिनेता आरके मेहताले सर–समानसहितका झोला लिएर निस्केको देखिएका छन् ।
चलचित्रमा स्मिता र आरकेसँगै निशा अधिकारी, बुद्धि तामाङ, विजय बराल, सरोज खनाल, पशुपति राई, कृष्णभक्त महर्जन, राजन खतिवडा, प्रवीण खतिवडा, लुनिभा तुलाधर, रवीन्द्र झा र अभयराज बराल लगायत कलाकारहरुको अभिनय रहेको छ ।
नेपाली रङ्गमञ्चमा अब्बल उपस्थिति जनाएका कलाकारहरूको जम्बो टिम रहेको चलचित्रलाई मनोरञ्जन सँगै कन्टेन्ट ओरिन्टेड भनिएको छ । निर्देशक योन्जनकै कथा, पटकथा रहेको चलचित्रको निर्माता योन्जन नै रहेका छन्। चलचित्रको कार्यकारी निर्माता नारायणप्रसाद बराल हुन् । राम बस्नेत लाइन प्रोड्यूसर छन् । सह–निर्मातामा रेनुका कार्की ढोली रहेकि छिन् ।
चलचित्रमा कृष्ण भण्डारी र निर्देशक योन्जनको सम्पादन रहेको छ । आलोक शुक्लाको छायाङ्कन रहेको चलचित्रमा सङ्गीत दीपक आरजे र जयन जे वाइबाको रहेको छ ।
चलचित्र ढाका टोपी फिल्मस्, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा तयार गरिएको हो । चलचित्रलाई आरआर फिल्मस्ले प्रदर्शन तथा वितरण गर्ने भएको छ ।
Discussion about this post