विशेष अनलाइन । वसन्त निरौला निर्देशित चलचित्र ‘ज्वाइँ साब’ को प्रदर्शन मिति तय भएको छ । निर्माण टिमले मंगलबार चलचित्रको दुई पोस्टर सार्वजनिक गर्दै प्रदर्शन मिति तय गरेको छ । चलचित्र असोजको २४ गते फूलपातिबाट देशभरका हलहरुमा प्रदर्शन हुने निर्देशक निरौलाले बताएका छन् । प्रस्तुततकर्ता राजकुमार पण्डितले सबैसँग सल्लाह गरेर फूलपातीमा चलचित्र प्रदर्शन गर्न लागिएको जानकारी दिए ।
पण्डितको प्रस्तुतिमा तयार भएको चलचित्रको मुख्य भूमिकामा कलाकार जितु नेपाल रहेका छन् ।उनलाई नायिका नीति शाहले साथ दिएकी छिन् ।चलचित्रमा बुद्धि तामाङ, शिशिर वाङ्देल, प्रकाश घिमिरे, रमेश वुढाथोकी, निमा पाण्डे, हिमेश पन्त, शिवहरि वैरागी, राजेन्द्र नेपाली, कविता आले, शिवु पाण्डे लगायतका कलाकारहरूको अभिनय रहेको छ ।
चलचित्र को एक गीतको मात्र छायाङ्कन गर्न बाँकी छ । हाल चलचित्र को धमाधम पोष्ट प्रोडक्शनको काम भइरहेको निर्माण टिमले जानकारी दिएको छ ।
विजय बस्याल कार्यकारी निर्माता रहेको चलचित्रमा सविन अधिकारीको कथा, शंकर धितालको पटकथा तथा संवाद रहेको छ । रेड आई फिल्मस्को प्रस्तुतिमा ओएसआर डिजिटल र मौसम फिल्मस्को सहकार्य रहेको चलचित्रमा मिनादेवी खड्का, सौगात पण्डित र पदमलाल तामाङको लगानी रहेको छ । चलचित्रमा श्याम तामाङको डीओपी, अर्जुन पोखरेल र महेश ताम्राकारको संगीत रहेको छ ।चलचित्रलाई काठमाडौँमा रिच इन्टरटेन्मेन्ट र मोफसलमा एफडी कम्पनीले वितरण गर्ने भएको छ ।
Discussion about this post