विशेष अनलाइन । आज शुक्रवारदेखि अपेक्षित दुई चलचित्र प्रदर्शनमा आएका छन् । एकैसाथ प्रदर्शनमा आएका दुई चलचित्र हुन् ‘लन्डन टु पेरिस’ र ‘गाउँ आएको बाटो’ । नवीन सुब्बा निर्देशित चलचित्र ‘गाउँ आएको बाटो’ले दुर्गम गाउँको आर्थिक बिपन्नताको कथा प्रस्तुत गरेको छ भने ‘लन्डन टु पेरिस’ले प्रेम र बिछोडको विषय उठान गरेको छ । ‘गाउँ आएको बाटो’मा बाबु र छोरा बिचको प्रेम प्रस्तुत गरिएको छ । मेन्छ्याम फिक्चर्स र बाँसुरी फिल्मस्को संयुक्त ब्यानरमा निर्माण भएको चलचित्रमा दयाहाङ राई, पशुपति राई, प्रेम सुब्बा तथा बालकलाकार प्रसन राईको मुख्य भुमिका रहेको छ ।
चलचित्रले ‘नेपाली समाजमा निम्न वर्गिय परिवारमासन्तान हुर्काउन बाबुले गर्नुपरेको संघर्षलाई उत्कृष्ट शैलिमा प्रस्तुत गरेको छ ।
चलचित्रलाई यसअघि क्यानडाको टोरोन्टो, दक्षिण कोरियाको बुसान, ब्राजिलको साउ पाउलो, भारतको मुम्बई, स्विडेनको गोटेबर्ग, चीनको बेइजिङलगायत महोत्सवमा प्रदर्शन गरिएको थियो । यसको छायांकन अमेरिकी छायाकार जोस हेरम र सम्पादन ताइवानका क्वान पुन लुङले गरेका हुन् ।
यस्तै शुक्रवारकै अवसरमा प्रदर्शनमा आएको चलचित्र ‘लन्डन टु पेरिस’लाई पनि अपेक्षित चलचित्रका रुपमा लिइएको छ । घनश्याम लामिछाने निर्देशित ‘लन्डन टु पेरिस’ ले प्रेम तथा बिछोड बिचको उतारचडापको कथा प्रस्तुत गरेको छ । चलचित्रमा साम्राज्ञी राज्यलक्ष्मी शाह, निश्चल खड्का, कबिर खड्का, गरिमा शर्मा, रुष्मा थापा, मनिश श्रेष्ठ, मनिष गान्धी लगायतको अभिनय रहेको छ । निश्चल र गरिमाले यहि चलचित्रबाट अभिनयमा डेब्यु गरेका हुन् ।
ट्राभल लभस्टोरीको कथामा निर्माण भएको चलचित्रको कथा, पटकथा र संवाद प्रदीप भारद्धाजले लेखेका हुन् । अमित बस्नेतले निर्माण गरेको चलचित्र ‘लन्डन टु पेरिस’ रोहित कट्टेल र रत्न श्रेष्ठको आरआर फिल्मस्ले वितरण गरेको हो ।
Discussion about this post