‘सतीदेवी’को दोस्रो पोस्टरले दर्शकमा बढाएको कौतुहलता

विशेष अनलाइन । चलचित्र ‘सतीदेवी’को दोस्रो पोस्टर सार्वजनिक गरिएको छ । सार्वजनिक पोस्टरमा नायिका मलिका महतको आँखाबाट बलिन्द्र आँसु झरिरहेको र सोही अवस्थामा उनले नवजात शिशुलाई स्तनपान गराइरहेको देख्न सकिन्छ ।

सार्वजनिक पोस्टरमा मलिकासँगै दुई बाल–कलाकारहरु हर्षिका वली र मन्जिला बानियाँ रोइरहेका छन् । हर्षिका हातमा चप्पल समातेर विक्षिप्त अवस्थामा छिन् भने आँसु झारिरहेकी मन्जिलाले एउटा पनि पात नभएको सानो रुखको हाँगा काँधमा बोकेकी छन् ।

साउन ४ गतेबाट अलनेपाल प्रदर्शनमा आउन लागेको चलचित्र ‘सतीदेवी’ को यसअघि सार्वजनिक पोस्टरमा मलिकालाई कालो मोसो दलेको देखाइएको थियो । चलचित्रले विभिन्न ठाउँमा गरिएको विशेष प्रदर्शनीमा उत्कृष्ट प्रतिक्रिया पाएका कारण पनि निर्माण युनिट उत्साहित छ ।

चलचित्रमा मलिका, बालकलाकार हर्षिका र मञ्जिला सँगै सन्दीप बाबु लोहनी, रमेश बुढाथोकी, कुलदीप अधिकारी, भोला सापकोटा, सृजना अधिकारी, सुजिता सिवाकोटी, सन्देश लिम्बु, मनिषा सापकोटा, जयन्त रेग्मी, बिमल श्रेष्ठ, देव महर्जन, तुलसी श्रेष्ठ, इभेन जोशी, इश्वरी सिंह, पवन केसी र जगदिश अधिकारी लगायतका कलाकारको अभिनय छ ।

चलचित्र लक्ष्मण सुवेदीको लेखन, निर्माण तथा निर्देशनमा तयार भएको हो । चलचित्रको छायांकन बाबु श्रेष्ठले गरेका छन् भने तारा थापाको सम्पादन, दीपक शर्मा र सुवास थापाको संगीत, रामजी लामिछानेको कोरियोग्राफी, देव महर्जनको एक्सन छ ।

चलचित्रले नेपाल ग्रामीण चलचित्र महोत्सवमा सर्वोत्कृष्ट पटकथा, सर्वोत्कृष्ट चलचित्रको अवार्ड जित्न सफल भएको थियो भने अभिनेत्री महतले जुरी अवार्ड हात पार्न सफल भएकी थिइन् । त्यस्तै सौराहामा आयोजित दक्षिण एसियाली फिल्म फेस्टिभलमा सर्वोत्कृष्ट निर्देशक र सर्वोत्कृष्ट चलचित्रको अवार्ड जित्न सफल भएको थियो ।